नवी दिल्ली : भारत आणि ऑस्ट्रेलिया यांच्यातील इंदूरच्या होळकर स्टेडियमवर बुधवारी म्हणजेच 1 मार्च रोजी होणारा तिसरा कसोटी सामना खूपच रोमांचक होऊ शकतो. भारतीय संघाचा कर्णधार रोहित शर्मा खास विक्रम करण्यावर लक्ष ठेवणार आहे. टीम इंडिया 2-0 ने आघाडीवर असून या कसोटी मालिकेत आपली खेळी आणखी मजबूत करू इच्छिते. ऑस्ट्रेलिया कसोटी मालिकेत पुनरागमन करण्याच्या इराद्याने मैदानात उतरेल. पण इंदूर कसोटी सामन्यात रोहित शर्मा एक मोठा विक्रम करू शकतो. आंतरराष्ट्रीय क्रिकेटमध्ये रोहित शर्माकडे 17,000 धावा पूर्ण करण्याची चांगली संधी आहे. 17 हजार धावा पूर्ण करण्यासाठी त्याला फक्त 45 धावांची गरज आहे.
हिटमॅनची आंतरराष्ट्रीय कारकिर्द : रोहित शर्माने आपल्या आंतरराष्ट्रीय कारकिर्दीत आतापर्यंत 47 कसोटी सामने, 241 एकदिवसीय सामने आणि 148 टी-20 आंतरराष्ट्रीय सामने खेळले आहेत. त्याने 47 कसोटीत 46.76 च्या सरासरीने 3320 धावा केल्या आहेत. या डावात रोहित शर्माने 9 शतके आणि 14 अर्धशतके केली आहेत. त्याच वेळी, त्याच्या एकदिवसीय कारकिर्दीत, त्याने 241 सामन्यांमध्ये 48.91 च्या सरासरीने 10882 धावा केल्या आहेत. 148 टी20 आंतरराष्ट्रीय सामन्यांच्या 140 डावात 3853 धावा केल्या. त्याने टी-20 आंतरराष्ट्रीय सामन्यांमध्ये 4 शतके झळकावली आहेत. रोहित शर्माने एकदिवसीय क्रिकेटमध्ये 30 शतके आणि 48 अर्धशतके केली आहेत. याशिवाय रोहित शर्माने क्रिकेटच्या वनडे फॉरमॅटमध्ये तीन द्विशतके झळकावली आहेत.
हिटमॅनसाठी चांगली संधी : रोहित शर्मा आज ऑस्ट्रेलियाविरुद्धच्या तिसऱ्या कसोटीत आंतरराष्ट्रीय क्रिकेटमध्ये 17 हजार धावांचा आकडा गाठू शकतो. त्यांच्यासाठी ही एक चांगली संधी ठरू शकते. आता या मैदानावर रोहित आपला नवा विक्रम करू शकेल की नाही हे तिसऱ्या सामन्यानंतरच कळेल.
भारत विरुद्ध ऑस्ट्रेलिया 3रा कसोटी सामना पिच रिपोर्ट 2023 : आत्तापर्यंत भारत आणि ऑस्ट्रेलिया यांच्यात खेळल्या जाणार्‍या 4 कसोटी सामन्यांपैकी बॉर्डर गावस्कर ट्रॉफीचे 2 सामने खेळले गेले आहेत आणि दोन्ही सामने टीम इंडियाने जिंकले आहेत. टीम इंडियाने कानपूरमधील पहिली कसोटी 132 धावांनी जिंकली तर टीम इंडियाने दिल्लीतील दुसरी कसोटी 6 गडी राखून जिंकून मालिकेत 2-0 अशी आघाडी घेतली. आता दोन्ही संघांमधील कसोटी मालिकेतील तिसरा सामना बुधवारपासून इंदूरमध्ये सुरू होणार आहे.
पिच फिरकी गोलंदाजांसाठी फायदेशीर : होळकर स्टेडियमची सुरुवात 2006 साली झाली आणि या मैदानावर पहिला सामना भारत आणि इंग्लंड यांच्यात खेळला गेला, तो एकदिवसीय सामना होता. या स्टेडियममध्ये 30 हजार प्रेक्षक एकत्र बसून सामना पाहू शकतात. होळकर क्रिकेट स्टेडियमबद्दल बोलायचे झाले तर इंदूरची ही खेळपट्टी फलंदाज आणि गोलंदाज दोघांसाठीही फायदेशीर आहे. ही पिच लाल मातीने बनलेली आहे, त्यामुळे ही पिच फिरकी गोलंदाजांसाठी खूप उपयुक्त ठरते. पहिले 2 दिवस या पिचवर फलंदाजांना चांगली मदत मिळते.
