नाशिक: नाशिकच्या प्रियांका घोडकेची ( Cricketer Priyanka Ghodke ) महाराष्ट्राच्या महिला क्रिकेट संघात निवड झाली आहे. माया सोनवणे व ईश्वरी सावकार ह्या दोन खेळाडूंच्या पाठोपाठ आता प्रियांकाची महाराष्ट्र संघात निवड झाली आहे. भारतीय क्रिकेट नियामक मंडळ (बीसीसीआय) तर्फे पुदुचेरी येथे आयोजित वरिष्ठ महिला टी-20 सामन्यांच्या स्पर्धेसाठी या तिघी आता महाराष्ट्र वरिष्ठ महिला संघाचे प्रतिनिधित्व करणार आहेत.
प्रियांका घोडके फलंदाज व ऑफ स्पिनर ( All-rounder Priyanka Ghodke ) आहे. प्रियांकाने महाराष्ट्रातर्फे तेवीस वर्षांखालील महिला क्रिकेट संघाचे, नोव्हेंबर 2019 मध्ये पुदुचेरी येथे झालेल्या टी-20 स्पर्धेत प्रतिनिधित्व केले होते. ज्यामध्ये तिने उत्कृष्ट कामगिरी केली होती. तसेच 2018-19 च्या हंगामात टी-20 स्पर्धेत महाराष्ट्रातर्फे सर्वाधिक बळी घेतले होते. तसेच महत्वाच्या सामन्यात अर्धशतके झळकावले आहेत. प्रियांकाने देखील 19 व 23 वर्षांखालील वयोगटासह, वरिष्ठ महिला क्रिकेट संघातही महाराष्ट्रतर्फे पश्चिम विभागाचे प्रतिनिधित्व केले आहे.
तसेच गेल्या ऑक्टोबरमध्ये डेहराडून येथे झालेल्या एकदिवसीय सामन्यांच्या स्पर्धेसाठी देखील प्रियांकाने महाराष्ट्रातर्फे वरिष्ठ महिला क्रिकेट ( Maharashtra women's cricket team ) संघाचे प्रतिनिधित्व केले होते. प्रियांकाच्या या निवडीबद्दल नाशिक जिल्हा क्रिकेट संघटनेचे चेअरमन विनोद शहा, सचिव समीर रकटे तसेच संघ प्रशिक्षक व जिल्हा क्रिकेट संघटनेच्या पदाधिकाऱ्यांनी अभिनंदन करून स्पर्धेतील उत्तम कामगिरीसाठी शुभेच्छा दिल्या आहेत.
वरिष्ठ महिला महाराष्ट्र संघाचे टी-20 स्पर्धेतील सामने पुढील प्रमाणे होणार आहेत -
18 एप्रिल आंध्र
19 एप्रिल केरळ
21 एप्रिल मेघालय
22 एप्रिल हैद्राबाद
24 एप्रिल राजस्थान
