मुंबई: आयपीएलच्या पंधराव्या हंगामाला सुरुवात झाली आहे. यंदा या स्पर्धेत 8 नव्हे तर 10 संघाचा सहभाग आहे. त्याचबरोबर आयपीएलच्या सामन्यांची संख्या देखील वाढली आहे. या पंधराव्या हंगामातील सामन्यांची संख्या 74 आहे. तसेच या हंगामात प्रत्येक संघ एकमेकापेक्षा वरचढ आहे. त्यामुळे आयपीएल 2022 चे विजेतेपद कोण पटकावेल हे सांगणे अवघड आहे. त्यातच आता चार वेळचा आयपीएल चॅम्पियन चेन्नई सुपर किंग्स ( IPL champions Chennai Super Kings ) नेतृत्वात बदल होऊनही आयपीएल 2022 चे विजेतेपद टिकवून ठेवण्यास सक्षम आहे, असा विश्वास ऑस्ट्रेलियाचा माजी क्रिकेटपटू मॅथ्यू हेडन यांनी ( Matthew Hayden Statement ) व्यक्त केला आहे.
दरम्यान, सीएसकेला या मोसमातील पहिल्या सामन्यात कोलकाता नाईट रायडर्स ( Kolkata Knight Riders )विरुद्ध सहा विकेट्सनी पराभव पत्करावा लागला होता, ज्यामध्ये त्यांची फलंदाजी आणि गोलंदाजी दोन्हीही त्यांना हवी तशी कामगिरी करू शकली नव्हती.पण रवींद्र जडेजाच्या नेतृत्वाखालील संघ गुरुवारी लखनौ सुपरजायंटशी सामना करताना ब्रेबॉर्न स्टेडियमवर आपले पहिले दोन गुण मिळविण्याचा प्रयत्न करेल.
ऑस्ट्रेलियाचा माजी फलंदाज मॅथ्यू हेडन ( cricketer Matthew Hayden ) म्हणाला, केकेआर विरुद्धच्या सलामीच्या सामन्यात झालेल्या पराभवामुळे सीएसके निराश होणार नाही. रवींद्र जडेजाच्या नेतृत्वाखालील संघासाठी अनेक सकारात्मक गोष्टी होत्या. पहिल्या सामन्यात त्यांचा टॉप ऑर्डर चालला नाही, पण त्यांच्यामध्ये खूप अनुभव आहे. पुढच्या सामन्यात ते जोरदार पुनरागमन करतील याची मला खात्री आहे. तो पुढे म्हणाला, स्पर्धेच्या पहिल्या सामन्यात मोईन अलीची उणीव भासली आणि तो पुढील सामन्यात निवडीसाठी उपलब्ध आहे.
