दुबई - दिल्ली कॅपिटल्सच्या गोलंदाजांनी केलेल्या टिच्चून माऱ्यासमोर सनरायझर्स हैदराबाद संघाला 134 धावांपर्यंत मजल मारता आली आणि दिल्लीला विजयासाठी 135 धावांचे आव्हान मिळाले. हैदराबादकडून अब्दुल समद याने सर्वाधिक 28 धावांचे योगदान दिले. तर राशिद खान 22 धावांवर धावबाद झाला. डेविड वॉर्नर, केन विल्यमसनसह वरच्या फळीतील फलंदाजांनी साफ निराशा केली. दिल्लीकडून कगिसो रबाडाने 3 तर एनरिक नॉर्खिया आणि अक्षर पटेल यांनी प्रत्येकी 2-2 गडी बाद केले.
सनरायझर्स हैदराबाद संघाचा कर्णधार केन विल्यमसन याने नाणेफेक जिंकून प्रथम फलंदाजी करण्याचा निर्णय घेतला. तेव्हा डेविड वॉर्नर आणि रिद्धीमान साहा ही जोडी सलामीला फलंदाजीसाठी आली. पण एनरिच नार्खिया याने पहिल्याच षटकात डेविड वॉर्नरला भोपळाही फोडू दिला नाही. त्याने त्याला शून्यावर अक्षर पटेलकडे झेल देण्यास भाग पाडले. यानंतर रिद्धीमान साहाच्या (18) रुपाने हैदराबादला दुसरा धक्का बसला. कगिसो रबाडा याने त्याला शिखर धवन करवी झेलबाद केले.
मनिष पांडे आणि केन विल्यमसन या जोडीने डाव सावरण्याचा प्रयत्न केला. पण अक्षर पटेलला मोठा फटका मारण्याच्या मोहात उडालेला केन विल्यमसनचा झेल हेटमायर याने टिपला. विशेष म्हणजे केन विल्यमसनला या झेलआधी दोन जीवदान मिळाले होते. तरी देखील तो या जीवदानाचा फायदा घेऊ शकला नाही. त्याने 18 धावा केल्या. विल्यमसन पाठोपाठ मनिष पांडे देखील माघारी परतला. पांडेला कगिसो रबाडाने स्लोवर वन चेंडूने चकवलं. बॅटची कट घेऊन उडालेला झेल खुद्द रबाडा यानेच घेतला. त्याने 17 धावांची खेळी केली.
एनरिक नार्खियाने केदार जाधवला (3) पायचित करत हैदराबादला पाचवा धक्का दिला. तेव्हा अब्दुल समद आणि जेसन होल्डर जोडीने सुरूवातील एकेरी दुहेरी धाव घेत संघाची धावसंख्या वाढवली. पण अखेरच्या हाणामारीच्या षटकात जेसन होल्डर (10) अक्षर पटेलचा बळी ठरला. तेव्हा अब्दुल समदने डावाची सुत्रे हाती घेत संघाला शंभरी पार करून दिली. त्याला राशिद खानने साथ दिली.
समदची विकेट रबाडाने घेतली. त्याने 2 चौकार आणि 1 षटकारासह 28 धावा केल्या. तर राशिद खान 22 धावांवर धावबाद झाला. भुवनेश्वर कुमार 5 धावांवर नाबाद राहिला. अखेरीस हैदराबादच्या संघाला 9 बाद 134 धावांपर्यंत मजल मारता आली. दिल्लीकडून कगिसो रबाडाने सर्वाधिक 3 विकेट घेतल्या. तर एनरिक नार्खिया आणि अक्षर पटेल यांना प्रत्येकी 2-2 गडी बाद करत रबाडाला चांगली साथ दिली.
हेही वाचा - IPL 2021: कार्तिकने काय षटक फेकले, दिग्गजांकडून कार्तिक त्यागीचे कौतुक
हेही वाचा - IPL 2021 : राजस्थान रॉयल्सचा कर्णधार संजू सॅमसनला झाली शिक्षा, कारण...
