मुंबई - भारतीय संघ इंग्लंड दौऱ्यावर जाणार आहे. या दौऱ्यात जागतिक अजिंक्यपद स्पर्धेचा अंतिम सामना न्यूझीलंडविरुद्ध तर ५ सामन्यांची कसोटी मालिका इंग्लंडविरुद्ध टीम इंडिया खेळणार आहे. याच काळात भारताचा दुसरा सामना श्रीलंकेचा दौरा करणार आहे. पण या दौऱ्याबाबत अद्याप अनिश्चितता आहे. कारण श्रीलंकेत कोरोनाचा प्रादुर्भाव वाढत आहे. आता भारतीय संघ आणखी एका देशाचा दौरा करणार असल्याचे समोर आले आहे.
मिळालेल्या माहितीनुसार, भारतीय संघ २०२२ वर्षाच्या नोव्हेंबर महिन्यात बांगलादेशचा दौरा करणार आहे. या दौऱ्यात २ कसोटी, ३ एकदिवसीय सामन्याची मालिका खेळवण्यात येणार आहे.
दरम्यान, उभय संघात २०१९ मध्ये भारतात कसोटी मालिका खेळवण्यात आली होती. यात कोलकातामध्ये खेळवण्यात आलेल्या पिंक बॉल कसोटी सामन्याचा समावेश होता. या मालिकेनंतर अद्याप उभय संघात कोणतीही मालिका झालेली नाही. याचे प्रमुख कारण कोरोनाचा प्रादुर्भाव आहे.
एका क्रीडा संकेतस्थळाने दिलेल्या वृत्तानुसार, बांग्लादेश क्रिकेट बोर्ड २०२१ ते २०२३ या वर्षामध्ये होणाऱ्या मालिकेचे प्रसारण हक्क विकणार आहे. या काळात ऑस्ट्रेलिया सारखे मोठे संघ बांग्लादेशचा दौरा करणार आहेत. इंग्लंडचा संघ देखील बांग्लादेशमध्ये टी-२० आणि एकदिवसीय सामन्याची मालिका खेळणार आहे. त्यानंतर जानेवारी २०२३ पर्यंत न्यूझीलंड, पाकिस्तान आणि अफगाणिस्तानचा संघ देखील बांग्लादेशचा दौरा करणार आहेत.
दरम्यान, सद्यघडीला बांग्लादेशचा संघ श्रीलंकाविरुद्धच्या तीन एकदिवसीय सामन्याच्या मालिकेची तयारी करत आहे. या मालिकेसाठी श्रीलंकेचा संघ बांग्लादेशमध्ये दाखल झाला आहे.
हेही वाचा - तौक्ते चक्रीवादळाचा वानखेडे स्टेडियमला तडाखा; स्टँडची अशी झाली अवस्था, पाहा फोटो
