सिडनी - टीम इंडियाने ऑस्ट्रेलियाविरुद्धचा दुसरा टी-२० सामना जिंकत टी-२० मालिकेत २-० अशी विजयी आघाडी घेतली. या सामन्यात टीम इंडियाचा फिरकीपटू युझवेंद्र चहल अपयशी ठरला. त्याच्या ४ षटकात ५१ धावा फटकावल्या गेल्या. असे असले तरी, त्याने मोठा विक्रम आपल्या नावावर केला आहे.
हेही वाचा - माजी कर्णधार सरफराज अहमदचे पाक संघात पुनरागमन
आंतरराष्ट्रीय टी-२० क्रिकेटमध्ये भारताकडून सर्वाधिक विकेट्स घेण्याच्या बाबतीत लेगस्पिनर चहलने वेगवान गोलंदाज जसप्रीत बुमराहची बरोबरी केली आहे. सिडनी क्रिकेट मैदानावर (एससीजी) ऑस्ट्रेलियाविरुद्ध खेळल्या गेलेल्या सामन्यात चहलने एक गडी बाद केला. त्यामुळे बुमराह आणि चहल टी-२०मध्ये भारताकडून सर्वाधिक विकेट्स घेणाऱ्या गोलंदाजांमध्ये संयुक्तपणे पहिल्या स्थानावर आहेत. बुमराह आणि चहल यांच्या नावावर टी-२० क्रिकेटमध्ये प्रत्येकी ५९ विकेट्स आहेत.
बुमराहने ५० सामन्यात तर चहलने ४४ सामन्यात ५९ विकेट्स घेतल्या आहेत. बुमराह-चहलनंतर भारताकडून सर्वाधिक विकेट्स घेणारे गोलंदाज अश्विन आणि भुवनेश्वर कुमार आहेत. दोघांच्या नावावर अनुक्रमे ५२ आणि ४१ विकेट्स आहेत.
चहलच्या नावावर नकोसा विक्रम -
आंतरराष्ट्रीय टी-२० क्रिकेटमध्ये तीनवेळा ५० पेक्षा जास्त धावा देणारा चहल हा एकमेव फिरकीपटू ठरला आहे. नाणेफेक गमावलेल्या ऑस्ट्रेलियाने भारताला विजयासाठी १९५ धावांचे कठीण आव्हान दिले होते. भारताने २ चेंडू आणि ६ फलंदाज राखून हे आव्हान पूर्ण केले.
