नवी दिल्ली Cricket World Cup २०२३ : क्रिकेट विश्वचषकात आज झालेल्या सामन्यात पाच वेळच्या विश्वविजेत्या ऑस्ट्रेलियानं नवख्या नेदरलॅंडचा ३०९ धावांनी दणदणीत पराभव केला. प्रथम फलंदाजी करताना ऑस्ट्रेलियानं निर्धारित ५० षटकांत ३९९-८ धावा केल्या. प्रत्युत्तरात नेदरलॅंडचा संघ २१ षटकांत अवघ्या ९० धावांवर ऑलआऊट झाला.
डेव्हिड वॉर्नरची शतक : या सामन्यात ऑस्ट्रेलियानं नाणेफेक जिंकून प्रथम फलंदाजीचा निर्णय घेतला होता. मात्र सलामीवीर मिचेल मार्श १५ चेंडूत ९ धावा करून स्वस्तात बाद झाला. त्यानंतर आलेल्या स्टीव स्मिथनं डेव्हिड वॉर्नरच्या मदतीनं जोरदार फटकेबाजी सुरु केली. या दोघांनी नेदरलॅंडच्या गोलंदाजांना सामन्यात परतण्याची एकही संधी दिली नाही. वॉर्नरनं या विश्वचषकातील त्याचं दुसरं शतक ठोकलं. तो ९३ चेंडूत १०४ धावा करून बाद झाला.
मॅक्सवेलची ऐतिहासिक खेळी : ऑस्ट्रेलियाकडून स्टिव स्थिथनं ६८ चेंडूत ७१ धावा केल्या. तर लाबुशेननं ५७ चेंडूत ६२ धावांचं योगदान दिलं. आजचा सामना खऱ्या अर्थानं गाजवला तो स्फोटक फलंदाज ग्लेन मॅक्सवेलनं. त्यानं तुफानी फलंदाजी करत अवघ्या ४० चेंडूत शतक ठोकलं. हे विश्वचषकाच्या इतिहासातील सर्वात वेगवान शतक आहे. तो ४४ चेंडूत १०६ धावा करून परतला. ऑस्ट्रेलियानं ५० षटकांत ३९९-८ धावा केल्या. नेदरलॅंडकडून वॅन बीकनं ७४ धावा देत ४ बळी घेतले.
अ‍ॅडम झम्पाचे ४ बळी : ऑस्ट्रेलियानं दिलेल्या ४०० धावांच्या विशालकाय लक्ष्याचा पाठलाग करताना नेदरलॅंडची टीम केव्हाच सामन्यात दिसली नाही. नियमित अंतरानं गडी बाद होत गेल्यानं त्यांची फलंदाजी ढेपाळली. नेदरलॅंडकडून सलामीवीर विक्रमजीत सिंगनं सर्वाधिक २५ धावा केल्या. ऑस्ट्रेलियाकडून फिरकीपटू अ‍ॅडम झम्पानं चिवट गोलंदाजी केली. त्यानं ३ षटकांत फक्त ८ धावा देत ४ बळी घेतले.
दोन्ही संघांची प्लेईंग इलेव्हन :
ऑस्ट्रेलिया : मिचेल मार्श, डेविड वार्नर, स्टीव स्मिथ, मार्नस लाबुशेन, जोश इंग्लिश (यष्टिरक्षक), ग्लेन मॅक्सवेल, कॅमरुन ग्रीन, मिचेल स्टार्क, पॅट कमिन्स (कर्णधार), अ‍ॅडम झम्पा, जोश हेजलवुड
नेदरलँड : विक्रमजीत सिंग, मॅक्स ओ'डॉउड, कॉलिन एकरमॅन, बास डी लीडे, साइब्रांड एंगेलब्रेक्ट, तेजा निदामानुरु, स्कॉट एडवर्ड्स (यष्टिरक्षक/ कर्णधार), लॉगान वॅन बीक, रूलोफ वैन डेर मेरवे, आर्यन दत्त, पॉल वैन मीकेरेन
हेही वाचा :
- Afghanistan Cricket Team : ना स्वतःचं स्टेडियम, ना सरकारची मदत तरीही...; वाचा अफगाणिस्तान क्रिकेट संघाची प्रेरणादायी कथा
- Cricket World Cup २०२३ : दक्षिण आफ्रिकेचा बांग्लादेशवर दणदणीत विजय, महमुदुल्लाचं शतक व्यर्थ
- Cricket World Cup २०२३ : अफगाणिस्तान आता कोणत्याही संघाला पराभूत करू शकतो, पाकिस्तानवरील विजय अनपेक्षित नव्हता - पटवाल
