अहमदाबाद - टीम इंडियाचा यष्टिरक्षक फलंदाज रिषभ पंत सध्या त्याच्या चांगल्या फॉर्ममुळे चांगलाच चर्चेत आहे. ऑस्ट्रेलियात त्याने चांगली कामगिरी केली होती. हाच फॉर्म त्याने इंग्लंड दौऱयावरही कायम राखला आहे. यष्टिरक्षणाच्या बाबतीतही त्याने टीकाकारांची तोंडे बंद केली आहेत. ऑस्ट्रेलिया दौऱ्यावर यष्टिरक्षण करताना त्याचे अनेक व्हिडिओ व्हायरल झाले होते. यात त्याचा स्पायडरमॅनचे गाणे गातानाचा व्हिडिओ नेटकऱ्यांनी उचलून धरला होता. आता रिषभच्या नवीन व्हिडिओमुळे तो पुन्हा एकदा चर्चेचा विषय ठरला आहे.
हेही वाचा - आजपासून रंगणार विजय हजारे ट्रॉफी स्पर्धा, 'स्टार' खेळाडूंकडे असणार लक्ष
रिषभचा वर्कआउट करतानाचा एक व्हिडिओ व्हायरल झाला आहे. यात चक्क तो स्पायडरमॅन वर्कआउट करताना दिसत आहे. इतकेच नव्हे तर, या व्हिडिओमध्ये स्पायडरमॅनचे गाणेही वाजत आहे. भारतीय संघाचा फिरकीपटू वॉशिंग्टन सुंदरने हा व्हिडिओ शेअर केला आहे. ऑस्ट्रेलिया दौऱ्यावर असताना पंतचा ''स्पायडरमॅन स्पायडरमॅन तूने चुराया मेरे दिल का चैन'', हे गाणे गातानाचा व्हिडिओ व्हायरल झाला होता.
मालिकेत बरोबरी -
भारत-इंग्लंड यांच्यात चार सामन्यांची कसोटी मालिका खेळवली जात आहे. यातील पहिले दोन सामने चेन्नई येथे खेळवण्यात आले. पहिला सामना इंग्लंडने तर, दुसरा सामना भारतीय संघाने ३१७ धावांनी जिंकत मालिकेत १-१ ने बरोबरी साधली. उभय संघातील तिसऱ्या सामन्याला २४ फेब्रुवारीपासून सुरुवात होणार आहे.
