MI vs SRH : प्ले ऑफचे तिकीट मिळवण्यासाठी मैदानात उतरेल हैदराबाद; पुढे आहे बलाढ्य मुंबई

आज आयपीएलच्या तेराव्या हंगामातील साखळी फेरीचा अखेरचा सामना मुंबई इंडियन्स आणि सनरायझर्स हैदराबाद यांच्यात होणार आहे. हैदराबादसाठी हा सामना अत्यंत महत्वाचा असून प्ले ऑफचे तिकीट मिळवण्यासाठी त्यांना कोणत्याही स्थितीत मुंबईला पराभूत करावे लागणार आहे.

शारजाह - प्ले ऑफचे तिकीट मिळवायचे असल्यास सनरायझर्स हैदराबादला मुंबई इंडियन्सवर कोणत्याही परिस्थितीमध्ये आज विजय मिळवावा लागणार आहे. मागील सलग दोन विजयांमुळे हैदराबादचा आत्मविश्वास उंचावला आहे. तर मुंबईने गुणतालिकेत अव्वलस्थान राखत आधीच प्ले ऑफचे तिकीट पक्के केले आहे. यामुळे त्यांच्यासाठी हा सामना औपचारिक आहे.

...तर अंतिम चारमध्ये प्रवेश

हैदराबादचा संघ सध्या गुणतालिकेत पाचव्या स्थानावर आहे. असे असले तरी नेट रनरेट चांगला असल्याने, ते मुंबईविरुद्ध विजय मिळवून अंतिम चार संघांमध्ये प्रवेश मिळवू शकतात. डेव्हिड वॉर्नर, वृद्धीमान साहा चांगली कामगिरी करत आहेत. त्यांना मनीष पांडे, केन विल्समसन, जॉनी बेअरस्टोची साथ आहे. तसेच जेसन होल्डर अष्टपैलूत्व सिद्ध करीत आहे. रॉयल चॅलेंजर्स बंगळुरुविरुद्धच्या मागील सामन्यात होल्डरने संदीप शर्माच्या साथीने डेथ ओव्हरमध्ये टिच्चून गोलंदाजी केली होती. नटराजन आणि फिरकीपटू राशीद खान यांच्यामुळे हैदराबादचा गोलंदाजीचा मारा वैविध्यपूर्ण असा आहे.

मुंबई इंडियन्स सुसाट