हैदराबाद - सनरायझर्स हैदराबादचा सलामी फलंदाज जॉनी बेअरस्टोने चेन्नई सुपरकिंग्सविरुद्ध मिळालेल्या विजयाचे श्रेय गोलंदाजांना दिले आहे. हैदराबादच्या राजीव गांधी आंतरराष्ट्रीय क्रिकेट स्टेडियमवर बुधवारी खेळल्या गेलेल्या सामन्यात हैदराबादने चेन्नईवर ६ गडी राखून विजय मिळवला.
सामना झाल्यानंतर बेअरस्टो म्हणाला की, आमचा संघ आयपीएलमधील एक सर्वोत्तम संघांपैकी एक आहे. चेन्नईविरुद्धच्या सामन्याच आमच्या गोलंदाजांनी शानदार कामगिरी करत अखेरच्या ११ षटकांमध्ये केवळ ६०-६५ धावा दिल्याने सामना आमच्याकडे वळला. या सामन्यात हैदराबादसाठी राशिद खानने ४ षटकांमध्ये १७ धावा देत सर्वाधिक २ गडी बाद केले.
चेन्नईविरुद्ध बुधवारी खेळल्या गेलेल्या या सामन्यात चेन्नईने नाणेफेक जिंकून प्रथम फलंदाजी निर्णय घेत निर्धारीत २० षटकांमध्ये फक्त १३२ धावा केल्या होत्या. या आव्हानाचा पाठलाग करताना हैदराबादच्या संघाने १६.५ षटकांमध्ये ४ गडी गमावत विजय मिळवला. हैदराबादसाठी सलामीवीर वॉर्नरने ५० तर बेअरस्टो ६१ धावांची महत्त्वपूर्ण खेळी करत संघाला विजय मिळवून दिला.
