मेलबर्न - क्रिकेट ऑस्ट्रेलियाने खेळाडूंशी २०२०-२१ या वर्षासाठी करार केला आहे. यात मार्नस लाबुशेनसह सहा नवीन खेळाडूंशी ऑस्ट्रेलिया बोर्डाने करार केला आहे. तर डावखुरा फलंदाज उस्मान ख्वाजासह ५ जणांना करारमुक्त केलं आहे. आश्चर्याची बाब म्हणजे, महिला खेळाडूंच्या करारामध्ये २०१७ पासून संघाबाहेर असलेल्या ताहिला मॅकग्रा हिला स्थान देण्यात आले आहे.
क्रिकेट ऑस्ट्रेलियाने अ‌ॅशेसपासून फॉर्मात असलेल्या मार्नस लाबुशेनशी करार केला आहे. याशिवाय, अ‌ॅश्टन एगर, जो बर्न्स, मिशेल मार्श, केन रिचर्डसन, मॅथ्यू वेड यांच्याशीही करार करण्यात आला आहे. तर ख्वाजासह पीटर हँड्सकॉम्ब, मार्कस हॅरिस, नाथन कूल्टर नाइनल आणि मार्कस स्टोयनिस यांना करारमुक्त करण्यात आले आहे.
लाबुशेनने २०१८ मध्ये पदार्पण केले. तो सद्य घडीला आयसीसीच्या कसोटी रॅकिंगमध्ये तिसऱ्या स्थानावर आहे. त्याने आतापर्यंत १४ कसोटीत ६३ च्या सरासरीने १४५९ धावा केल्या आहे. त्याने २ एकदिवसीय सामने खेळली असून यात त्याची सरासरी ५० हून अधिक आहे. या कामगिरीचा फायदा लाबुशेनला झाला आहे.
ऑस्ट्रेलियाने २० पुरुष खेळाडूंशी तर १५ महिला खेळाडूंशी करार केला आहे. ताहिला मॅकग्रा २०१७ पासून संघाबाहेर आहे पण तिच्याशी क्रिकेट ऑस्ट्रेलियाने करार केला आहे. ताहिलाने शेवटचा सामना भारत अ संघाविरुद्ध खेळला होता. महिला खेळाडूंमध्ये टेआला व्लामिनेक आमि अ‌ॅनाबेल सदरलँड यांच्याशी करार करण्यात आला आहे. तर निकोल बोल्टन, एलिस विलानी आणि एरिन बर्न्स यांना करारमुक्त करण्यात आले आहे.
क्रिकेट ऑस्ट्रेलियाने करार केलेले पुरुष खेळाडू -
अ‌ॅश्टन एगर, जो बर्न्स, अ‌ॅलेक्स कॅरी, पॅट कमिंन्स, अ‌ॅरोन फिंच, जोश हेजलवुड, ट्रॅविस हेड, मार्नस लाबुशेन, नाथन लॉयन, मिशेल मार्श, ग्लेन मॅक्सवेल, टिम पेन, जेम्स पॅटीन्सन, झाय रिचर्डसन, केन रिचर्डसन, स्टीव स्मिथ, मिशेल स्टार्क , मॅथ्यू वेड, डेव्हिड वॉर्नर आणि अ‌ॅडम झम्पा.
क्रिकेट ऑस्ट्रेलियाने करार केलेले महिला खेळाडू -
निकोला कॅरी, एश्लीग गार्डनर, रेशेल हेन्स, एलिसा हिली, जेस जोनासेन, डेलिसा किमिसन, मेग लॅनिंग, ताहिला मॅकग्रा, सोफी मोलिनक्स, बेथ मूनी, एलिसा पेरी, मेगन शूट, एनाबेल सदरलॅड, टेला व्लाइमेक आणि जॉर्जिया वेयरहाम.
हेही वाचा - गेल पाठोपाठ रसेलने सीपीएलच्या फ्रँचायझीवर केले गंभीर आरोप, म्हणाला...
