मुंबई - भारतीय कसोटी संघाचा उपकर्णधार अजिंक्य रहाणेने दिग्गज फलंदाज सचिन तेंडुलकरशी घेतलेल्या पहिल्या भेटीची आठवण शेअर केली आहे. अजिंक्यने वयाच्या १४ वर्षी सचिनची भेट घेतली होती. सचिनने दिलेल्या वेळेपूर्वीच अजिंक्य तेथे दाखल झाला होता. आज २४ एप्रिलला सचिनचा ४७वा वाढदिवस आहे, त्यानिमित्त अजिंक्यने ही आढवण शेअर केली आहे.
इन्स्टाग्रामवर अजिंक्यने सचिनची आठवण काढली. त्याने इन्स्टाग्रामवरील व्हिडिओमध्ये म्हटले, की मी १४ वर्षांचा होतो आणि मी माझ्या प्रशिक्षकाला सांगितले, की मला सचिनला भेटायचे आहे. त्याने सचिनची परवानगी घेतली आणि सचिननेही ‘हो’ सांगितले. त्याने माझ्या प्रशिक्षकाला सांगितले, की रहाणेला संध्याकाळी साडेचार वाजता पाठवा.
मात्र, अजिंक्य सचिनला भेटण्यास इतका उत्साहित होता, की तो सकाळी साडेनऊ वाजता तिथे पोहोचला. रहाणे म्हणाला, “मी खूप उत्साही आणि घाबरलो होतो. आम्ही त्यावेळी डोंबिवलीत राहायचो. तिथून मी दादरला गेलो होतो. तिथे माझा प्रशिक्षक असायचा. सकाळी साडेनऊ वाजले होते. माझ्या प्रशिक्षकाने विचारले की आता या वेळी तू इथे काय करतोस ? मी म्हणालो, ट्रेन उशिरा आली किंवा रद्द झाली, तर मला सचिनला भेटता येणार नाही. मी ही संधी गमावू इच्छित नाही. ”
या भेटीनंतर रहाणेने फार आनंद झाल्याचे म्हटले आहे. मुंबई संघाकडून सचिन आणि अंजिक्य एकत्र खेळले आहेत.
