नवी दिल्ली: बीसीसीआय वार्षिक मानधनाच्या करार यादीतून (BCCI ANNUAL CONTRACT) वरिष्ठ कसोटी फलंदाज चेतेश्वर पुजारा आणि आणि अजिंक्य रहाणे यांना डिमोट करणे जवळपास निश्चित आहे. एका न्यूज वेबसाइटच्या माहितीनुसार, बीसीसीआयने ऑक्टोबर 2021 ते सप्टेंबर 2022 या वर्षासाठी खेळाडूंना दिले जाणाऱ्या मानधनाच्या कराराची यादी तयार करण्यात आली. यामध्ये चेतेश्वर पुजारा आणि रहाणे यांना ए मधून बी श्रेणीत स्थान दिले जाऊ शकते. त्याचबरोबर या दोघांप्रमाणे इशांत शर्माला देखील खराब कामगिरीमुळे बी श्रेणीत ढकलले जाऊ शकते.
तसेच असे सांगितले जात आहे की, मोहम्मद सिराजला (Bowler Mohammad Siraj) त्याच्या शानदार कामगिरीच्या जोरावर सी श्रेणीतून बी किंवा ए श्रेणीत प्रमोट केले जाऊ शकते. त्याचबरोबर मागील वर्षी अक्षर पटेलची कामगिरी सुद्धा चांगली राहिली होती. त्यामुळे त्याला देखील सी मधून बी श्रेणीत प्रमोट केले जाऊ शकते. मात्र बीसीसीआय उमेश यादवला सी श्रेणीत टाकू शकते. उल्लेखणीय म्हणजे अष्टपैलू खेळाडू शार्दुल ठाकुरने (All-rounder Shardul Thakur) केलेल्या जबरदस्त कामगिरीच्या जोरावर त्याला देखील प्रमोशन मिळू शकते.
बीसीसीआयने आपल्या खेळाडूंना चार श्रेणीत विभागले आहे. ज्यामध्ये ए+, ए, बी आणि सी श्रेणींचा समावेश आहे. या श्रेणीत असलेल्या खेळाडूंना वेगवेगळ्या स्वरुपाचे मानधन वार्षिक करारात दिले जाते. ए+, ए, बी आणि सी श्रेणीत असलेल्या खेळाडूंना अनुक्रमे सात, पाच, तीन आणि एक कोटी रुपये वार्षिक मानधन दिले जाते. त्याचबरोबर विराट कोहली (Batsman Virat Kohli), रोहित शर्मा आणि जसप्रीत बुमराह या वर्षीही ए+ श्रेणीत राहण्याची शक्यता आहे. तसेच रवींद्र जडेजा, केएल राहुल, रविचंद्रन अश्विन, ऋषभ पंत आणि मोहम्मद शमी यांना ए श्रेणीत स्थान देण्यात आले आहे.
बीसीसीआयच्या एका अधिकाऱ्याच्या माहितीननुसार टी-20 विश्‍व कप 2021 नंतर ड्राफ्ट तयार करण्यात आले होते. त्यामुळे लवकरच निर्णय घेतला जाण्याची शक्यता आहे.
