एकल कुटुंबपद्धतीच्या आग्रहामुळे सध्या एकत्र कुटुंब पद्धती लोप पावत आहे किंबहुना लोप पावली आहे. प्रत्येक कुटुंबपद्धतीचे फायदे आणि तोटे असले तरी एकत्र कुटुंबपद्धतीमध्ये मात्र कठीण काळात आधार मिळण्याची शाश्वती असते. परंतु व्यक्तिस्वातंत्र्याच्या प्रभावाखाली फोफावलेली एकल कुटुंबपद्धती माणसांना नैराश्याच्या अधीन करण्याची शक्यता अधिक असते. असो. विभक्त कुटुंब पद्धती फोफावत असताना पुन्हा एकत्र कुटुंबपद्धतीला नवसंजीवनी देणारी मालिका म्हणजे ‘तुझ्या माझ्या संसाराला आणि काय हवं’.
या मालिकेतील एकत्र कुटुंब पद्धती आणि एकंदरीतच देशमुख कुटुंबातील सदस्यांची एकमेकांबद्दलच नाही तर त्यांच्याकडील पशु-पक्षांबद्दल देखील असलेली आत्मीयता प्रेक्षकांना भावली आहे आणि त्यामुळेच या मालिकेला प्रेक्षकांचा उस्फुर्त प्रतिसाद मिळतोय. यात प्रेक्षकांचा लाडका ‘राणादा’ पुन्हा त्यांच्या भेटीला आलाय, एका वेगळ्या रूपात. झी मराठीवरील प्रेक्षकांची लोकप्रिय आणि कायम लक्षात राहील अशी व्यक्तिरेखा म्हणजे राणा दा. हा राणा म्हणजेच अभिनेता हार्दिक जोशी आता सिद्धार्थ देशमुख या नव्या व्यक्तिरेखेसह तुझ्या माझ्या संसाराला आणि काय हवं या नव्या मालिकेतून प्रेक्षकांच्या भेटीस आला आहे.
ही मालिका नुकतीच प्रेक्षकांच्या भेटीस आली असली तरी प्रेक्षकांचा या मालिकेला भरगोस प्रतिसाद मिळतोय. नुकतंच मालिकेत ऐश्वर्या म्हणजेच देशमुख घरातील म्हशीच बाळंतपण प्रेक्षकांनी पाहिलं. ऐश्वर्या बाळंत होणार, म्हणून घरातील सगळेचजण काळजीत असतात. प्रत्येकाची सुरु असलेली धावपळ बघून ऐश्वर्या म्हैस आहे की मुलगी यात अदितीचा गोंधळ होतो. दिवसाअंती म्हैस बाळंतपण सुखरूप पार पडतं आणि सगळेच टेन्शन फ्री होतात. त्यामुळे देशमुख कुटुंब हे फक्त माणसांपुरती मर्यादित नसून त्या घरातील पशु-पक्षी देखील त्यांचं कुटुंबच आहे असं सिद्धार्थ अदितीला सांगतो.
अदितीच्या भूमिकेत आहे अभिनेत्री अमृता पवार जिने या मालिकेबद्दल सांगताना म्हटले, ‘मोठ्या कुटुंबात न राहून आपण नक्की काय मिस करतोय हे आजच्या जनरेशनला या मालिकेच्या माध्यमातून समजतंय. मोबाईल आणि कॅाम्प्युटरच्या पलिकडे जाऊन माणसांचंही एक जग असतं हे युथला समजतंय. माणसं आपल्या आपल्यातच इतकी रमतात की, छोट्या कुटुंबातही त्यांचं एकमेकांकडं लक्ष नसतं. एकमेकांशी कम्युनिकेशनच नसतं. त्यात काय सुख असतं हे प्रेक्षकांना जाणवतंय, तुझ्या माझ्या संसाराला आणि काय हवं मालिकेतून.’
प्रेक्षकांचा मालिकेला मिळणार उत्फुर्त प्रतिसाद बघून अभिनेत्री अमृता पवार पुढे म्हणाली, "प्रेक्षकांचं प्रेम आणि पाठिंबा पाहून आम्हाला सगळ्यांनाच खूप आनंद होतो आहे. त्यांची उस्फुर्त प्रतिक्रिया हीच आमच्या कामाची पावती आहे. या मालिकेसारखं वातावरण खूप कमी बघायला मिळतं. अदितीला माणसांबद्दल भीती असणं हा गुण वास्तवातही कुठे ना कुठे पहायला मिळतो."
'तुझ्या माझ्या संसाराला आणि काय हवं' ही मालिका झी मराठीवर प्रसारित होते.
हेही वाचा -निखिल आडवाणी झालेत खूश, कारण, 'मुंबई डायरीज 26/11'ला मिळतोय प्रेक्षकांचा ‘पूश’!
