‘रंग माझा वेगळा’ मालिकेतील दीपा-कार्तिकच्या नात्यातली कटुता जुळ्या मुलींच्या जन्मानंतर तरी दूर होईल असं वाटत होतं. सौंदर्याने पुढाकार घेत या दोघांमधले गैरसमज दूर करण्याचा प्रयत्न केला. इतकंच नाही तर दीपाची एक मुलगी आपल्या घरात आणून कार्तिकचं मन वळवण्याचा प्रयत्न केला. मात्र परिस्थिती बदलण्याचं नाव घेत नाहीय. त्यामुळे दीपा-कार्तिक आणि त्यांच्या मुलींच्या नात्याचं भवितव्य नेमकं काय असणार याची उत्सुकता आता वाढली आहे.
दीपाने जुळ्या मुलींना जन्म दिला असला तरी दोन्ही मुली दोन वेगळ्या घरात वाढत आहेत. परंतु आता स्टार प्रवाहवरील ‘रंग माझा वेगळा’ मालिकेत दीपा आणि कार्तिकच्या मुलींचा नामकरण सोहळा पाहायला मिळणार आहे. कार्तिकने मुलींचं पितृत्व नाकारल्यामुळे दीपाने एकटीने मुलीला वाढण्याचा निर्धार केला आहे. तर दीपाची खूण म्हणून सौंदर्याने दीपाची एक मुलगी आपल्या घरी वाढवण्याचं ठरवलं आहे. दोन्ही मुली जरी वेगवेगळ्या घरात वाढत असल्या तरी योगायोगाने दोघींचा बारसं मात्र एकाच दिवशी आणि एकाच ठिकाणी होणार आहे.
देवावर श्रद्धा असणाऱ्या दीपाने आपल्या लेकीचा बारसं मंदिरात करायचं ठरवलं आहे. तर सौंदर्या इनामदारनेही कोणताही बडेजाव न करता मंदिरातच बारसं करण्याचा निर्णय घेतला आहे. दोन्ही मुलींचं नावही ठरवण्यात आली आहेत. दीपा आणि कार्तिकच्या नावावरुनच दीपिका आणि कार्तिकी असं नाव ठरवण्यात आलं आहे. आता या दोन लेकी दुरावलेल्या दीपा-कार्तिकला पुन्हा एकत्र आणणार का हे पहाणं उत्सुकतेचं असेल. ३० ऑगस्टच्या विशेष भागात हा नामकरण सोहळा पाहायला मिळणार आहे.
‘रंग माझा वेगळा’ ही मालिका स्टार प्रवाहवर प्रसारित होते.
हेही वाचा - ''माधुरीच..!!'' मिथीला पालकरचा हा सुंदर नवा लुक तुम्ही बघितलाय का...?
