मुंबई - स्वप्नील जोशी आणि सई देवधर यांची मुख्य भूमिका असलेला 'मोगरा फुलला' या सिनेमाचा भव्य ट्रेलर आणि म्युजिक लाँच सोहळा नुकताच मुंबईत पार पडला. यावेळी या सिनेमाची संपूर्ण स्टारकास्ट उपस्थित होती. आई मुलगा आणि त्याच्या आयुष्यात आलेली एक नवीन स्त्री यांच्याभोवती या सिनेमाची कथा गुंफण्यात अली आहे.
'सरकारनामा', 'लपंडाव' यासारखे एकाहून एक सरस सिनेमे देणाऱ्या श्रावणी देवधर यांचा दिग्दर्शनाखाली तयार झालेला 'मोगरा फुलला' हा सिनेमा येत्या १४ जूनला रिलीज होतोय. नातेसंबंधांवर भाष्य करणारी अशी ही एक कथा आहे. सचिन मोटे लिखीत या सिनेमात स्वप्नील जोशी हा पहिल्यादा एका नॉन ग्लॅमरस अशा भूमिकेत दिसणार आहे. डोळ्यापुढे चालणारा सरळमार्गी सुनील कुलकर्णीच्या व्यक्तिरेखेत तो आपल्याला दिसणार आहे. याशिवाय सई ही श्रावणी आणि देबु देवधर यांची कन्या असली तरीही मराठीत पहिल्यांदाच पदार्पण करत आहे. या दोघांशिवाय अभिनेत्री नीना कुलकर्णी यादेखील या सिनेमात सुनीलच्या आईच्या भूमिकेत दिसतील.
या सगळ्यांच्या सोबतच या सिनेमात समिधा गुरू, विघ्नेश जोशी, आशिष पाठक,संयोगीता भावे, दीप्ती भागवत, मिलिंद पाठक, सुहिता थत्ते, असे तब्बल २३ कलाकार काम करताना दिसणार आहेत. विशेष म्हणजे दिग्दर्शक चंद्रकांत कुलकर्णी हे या सिनेमात स्वप्नीलच्या काकाच्या भूमिकेत दिसणार आहेत.
या सिनेमाद्वारे गायक रोहित राऊत हा पहिल्यांदाच संगीत दिग्दर्शक म्हणून समोर आला आहे. सिनेमातील एक गाणं शंकर महादेवन यांनी गायलं आहे. तर, दुसरी गजल गायिका बेला शेंडे आणि रोहित यांनी मिळून गायली आहे. साध्या माणसांची साधी गोष्ट पहायची इच्छा असेल तर 'मोगरा फुलला' हा सिनेमा तुम्हाला नक्की आवडेल, अशी ग्वाही या सिनेमाच्या संपूर्ण टीमने दिली आहे.
