मराठी आणि हिंदी मनोरंजनसृष्टीत मोठ्या पडद्यावर विविधांगी भूमिका साकारणारा अभिनेता संजय नार्वेकर बऱ्याच काळानंतर छोट्या पडद्यावर प्रेक्षकांचे मनोरंजन करण्यासाठी सज्ज झालाय. ‘वास्तव’ मधील ‘देड फुट्या’ या संजय दत्तच्या मित्राची भूमिका करणारा संजय नार्वेकर आता ‘तुझ्या इश्काचा नादखुळा’ या मालिकेत इन्स्पेक्टरच्या भूमिकेत दिसणार आहे. स्टार प्रवाहाच्या या मालिकेत धमाकेदार वळण येणार असून सुप्रसिद्ध अभिनेता संजय नार्वेकर याची धडाकेबाज एण्ट्री होणार आहे. लवकरच मालिकेत इन्सपेक्टर गौतम साळवी यांच्या रुपात सुप्रसिद्ध अभिनेते संजय नार्वेकर दिसेल. बऱ्याच वर्षांनंतर संजय मालिका विश्वात पुनःपदार्पण करणार आहे.
तुझ्या इश्काचा नादखुळा मालिकेतील भूमिकेविषयी सांगताना संजय नार्वेकर म्हणाला, ‘कोणतंही पात्र साकारताना त्याला वेळ आणि योग्य न्याय देता आला पाहिजे असं मला वाटतं. सिनेमा आणि नाटक सुरु असल्यामुळे मला तो वेळ मालिकेसाठी देता आला नाही. नाटक आणि सिनेमामध्ये प्रेक्षकांनी मला पाहिलं आहे. मालिकेसाठी बराच वेळ द्यावा लागतो. मात्र आता सुवर्णयोग जुळून आलाय. व्यक्तिरेखा खूप छान आहे आणि वेळेचं गणितही जमून आलं आहे.’
संजय नार्वेकर पुढे म्हणाला की, ‘इन्सपेक्टर गौतम साळवी हा एक डॅशिंग, जबाबदार आणि प्रामाणिक पोलिस अधिकारी आहे. पोलीस डिपार्टमेंटमध्ये त्याची जबर चर्चा आहे. मिश्किल आणि जिंदादील स्वभावाचा असा हा प्रामाणिक पोलिस अधिकारी. प्रत्येक गोष्टीचा ते बारकाईने आणि खोलात जाऊन अभ्यास करतो. पंचतंत्राच्या गोष्टींचा दाखला देत तो बोलतो. कितीही गंभीर केस असली तरी गौतमच्या सहवासात त्याचं ओझं जाणवत नाही. माझ्या पद्धतीने मी या पात्रात वेगळेपणा आणण्याचा प्रयत्न मी करतो आहे.’
स्टार प्रवाहवरील ‘तुझ्या इश्काचा नादखुळा’ मालिका अतिशय उत्कंठावर्धक वळणावर येऊन पोहोचली आहे. गौतम साळवीच्या येण्याने मालिकेत नेमका काय धमाका होतो याची गोष्ट पुढच्या भागांमधून उलगडेलच. पण स्वाती आणि रघूचं आयुष्य नव्या वळणावर येणार हे मात्र नक्की.
‘तुझ्या इश्काचा नादखुळा’ ही मालिका स्टार प्रवाहवर प्रसारित होते.
हेही वाचा - ''मराठा सिर्फ दो ही बात जानता है...मारना या मरना'': ‘भुज द प्राइड ऑफ इंडिया’ चा ट्रेलर रिलीज
