मुंबई - अभिनेता जितेंद्र जोशीचा 'कलर्स मराठी' वाहिनीवरील 'दोन स्पेशल' कार्यक्रमाची लोकप्रियता दिवसेंदिवस वाढत आहे. विविध कलाकार या कार्यक्रमात आपल्या आयुष्यातील विविध किस्से उलगडत असतात. पाहुण्यांची विविध विषयावरील मते, त्यांच्या आयुष्यातील काही किस्से, आठवणी, अविस्मरणीय क्षण या कार्यक्रमातून प्रेक्षकांना बघायला मिळतात. यावेळी अभिनेते प्रशांत दामले आणि कविता लाड - मेढेकर हे या कार्यक्रमात हजेरी लावणार आहेत.
प्रशांत दामले आणि कविता लाड - मेढेकर यांच्याही आयुष्यातील बऱ्याच गोष्टी येणाऱ्या भागात प्रेक्षकांना ऐकता येणार आहेत. प्रशांत दामले मंचावर आले आणि गाणे होणार नाही, असे तर अशक्यच. गप्पांची सुरुवात 'मला सांगा सुख म्हणजे' या गाण्याने होणार आहे. याचसोबत प्रेक्षकांना अनेक सुंदर गाणीदेखील ऐकायला मिळणार आहेत.
हेही वाचा -'ह.म. बने तु.म. बने' मालिकेतून पहिल्यांदाच झळकणार तृतीयपंथी कलावंत
प्रशांत दामले नावापुढे आणि का लावत नाहीत आणि त्यामागील त्यांची भूमिका त्यांनी स्पष्ट केली. तर, ज्येष्ठ नाट्यनिर्माते सुधीर भट यांचा फोटो दाखवल्यावर प्रशांत दामले आणि कविता लाड खूपच भावुक झाले. त्यांच्याही काही आठवणींना दोघांनी उजाळा दिला. 'एका लग्नाची गोष्ट' या नाटकाचे हजार प्रयोग झाले तेव्हा महानायक अमिताभ बच्चन यांच्यासोबत काढलेला फोटो दाखवला, तेव्हा सुधीर भट यांनी बिग बींना कोणता प्रश्न विचारला, हे देखील त्यांनी सांगितले.
हेही वाचा -'हाऊसफूल ४' नंतर अक्षय कुमारची पुन्हा 'गुड न्यूज', पाहा धमाल ट्रेलर
आपली सगळी नाटकं मिळून मिळून एकूण १२ हजार २०० प्रयोग झाले आहेत, असंही त्यांनी सांगितलं. त्यांच्या आयुष्यातील आणखी धमाल किस्से या भागात ऐकण्याची संधी प्रेक्षकांना मिळणार आहे.
