‘सूर नवा ध्यास नवा’ या सांगीतिक रियालिटी शोने पहिल्याच पर्वापासून प्रेक्षकांच्या मनावर अधिराज्य गाजवायला लागले. हा लोकप्रिय कार्यक्रम लवकरच येत आहे, ‘सूर नवा ध्यास नवा - आशा उद्याची’ हे नवं कोरं पर्व घेऊन. या कार्यक्रमाचं हे चौथं पर्व असून ते १५ ते ३० वयोगटातील फक्त मुलींचंच हे विशेष पर्व असणार आहे. संगीतक्षेत्रातले दोन मान्यवर कलावंत ‘सूर नवा ध्यास नवा’ च्या या पर्वातून शोध घेतील, महाराष्ट्राच्या नव्या सुरांचा, महाराष्ट्राच्या नव्या महागायिकेचा.
या कार्यक्रमाचे सूत्रसंचालन करणार आहे सर्वांची लाडकी गुणी अभिनेत्री स्पृहा जोशी. स्पृहा जोशी या कार्यक्रमाबद्दल म्हणाली, “यावेळी मुलींचं विशेष पर्व असल्याने खूपच आनंद होतो आहे... सेटवर प्रचंड उत्साह आहे . महाराष्ट्रातील तमाम मुलींना यानिमित्ताने एक नवी प्रेरणा मिळेल अशी मला खात्री आहे. कलर्स मराठीचं खूप कौतुक कारण त्यांनी अशा पध्दतीचे पर्व आणले”.
या कार्यक्रमाबद्दल बोलताना प्रमुख, मराठी टेलिव्हीजन, वायाकॉम18 चे दीपक राजाध्यक्ष म्हणाले, “प्रत्येक मराठी माणूस तानसेन नसला तरी कानसेन नक्की आहे. म्हणूनच महाराष्ट्रातल्याच नव्हे तर जगातील मराठी माणसांच्या हृदयावर अधिराज्य गाजवलं ते कलर्स मराठीच्या ‘सूर नवा ध्यास नवा’ ह्या कार्यक्रमाने. मराठी माणूस खरा खुरा श्रीमंत आहे तो त्याच्या कलासक्त मनामुळे. संगीत, गाणं, नृत्य, नाट्य, चित्रपट, साहित्ययावर मनापासून प्रेम करतो तो मराठी माणूस. ‘सूर नवा ध्यास नवा’ चं यावेळचं पर्व मुलींचं विशेष पर्व आहे. महाराष्ट्रातल्याच नव्हे तर भारतभरातून मराठी मुलींनी या पर्वासाठी निवड प्रक्रियेत सहभाग नोंदवला. यातून विविध आर्थिक - सामाजिक स्तरातून मुलींची निवड या पर्वात झाली आहे. यात मुलींच्या गळ्यातील सूर तर आहेच पण हृदयातला हुंकारही आहे. आजवरच्या तिन्ही पर्वांनी रसिकांची पावती मिळवली आहे. तशीच दाद हे पर्वदेखील मिळवेल अशी आशा करतो”.
या अनोख्या पर्वात गायक मुलींना मार्गदर्शन करतील कार्यक्रमाचे दोन लाडके परीक्षक अर्थात सुप्रसिध्द गायक, संगीतकार नि अष्टपैलू अदाकार अवधूत गुप्ते आणि शास्त्रीय गायकीची परंपरा लाभलेले राष्ट्रीय पुरस्कार विजेते गायक महेश काळे. करोनाच्या आव्हानाला तोंड देत हे पर्व दिमाखदार करण्याचं आव्हान संपूर्ण टीमपुढे आहे. महत्वाची बाब म्हणजे या पर्वात महाराष्ट्राच्याच नव्हे तर जगातील सर्वच महिलांना मानवंदना देणारं हे पर्व असेल. हे पर्व महिलांसाठी विशेष असेलच पण त्यांच्या कुटुंबासठी, त्यामधील पुरूष मंडळीसाठी देखील विशेष असणार आहे.
कार्यक्रमाविषयी बोलताना महेश काळे म्हणाले की, “‘सूर नवा ध्यास नवा’ कार्यक्रम माझ्या हृदयाच्या खास जवळचा कार्यक्रम आहे. आणि यावेळचं पर्व तर महाराष्ट्रातील गायिकांचं पर्व आहे त्यामुळे हा सिझन या प्रवासातला एक वेगळा अध्याय असणार आहे. “सूर नवा ध्यास नवा आशा उद्याची” हा महाराष्ट्रातल्या गायिकांचा शोध आहे. त्यामुळे सुरांचा हा अद्भुत सोहळा असणार आहे नि त्या सोहळ्यासाठी मी अत्यंत उत्सुक आहे.
अवधूत गुप्तेंसाठी हे पर्व खास असणार आहे कारण पहिल्यांदाच ते दुहेरी भूमिका पार पडणार आहेत म्हणजेच यावर्षी परीक्षणासोबत कार्यक्रमाचे निर्माते देखील आहेत. याविषयी बोलताना ते म्हणाले, “सूर नवा ध्यास नवा” हा कार्यक्रम पहिल्या पर्वाच्या पहिल्या दिवसापासून माझ्या आयुष्यातील अविभाज्य घटक बनला आहे. यंदाच्या वर्षी मात्र जबाबदारी वाढली आहे कारण, या चौथ्या पर्वाचा मी निर्माता देखील आहे. परीक्षक म्हणून मी जितक्या प्रामाणिकपणे ही जबाबदारी पेलत आलेलो आहे, तितक्याच प्रामाणिकपणे निर्माता म्हणून देखील माझी जबाबदारी मोठी आहे.”
‘सूर नवा ध्यास नवा’ या सूरतालाच्या मैफिलीत आपलं कौशल्य सिद्ध करण्यासाठी निवडक स्वयंसिद्धा सज्ज आहेत सूरांच्या या नव्या कोऱ्या अलौकिक मैफलीसाठी. ५ एप्रिलपासून कलर्स मराठीवर हा कार्यक्रम प्रसारित होईल.
हेही वाचा - अभिनेता रजनीकांत यांना दादासाहेब फाळके पुरस्कार जाहीर
