मराठी चित्रपटांत आशयघनतेबरोबरच ‘मॅड’ कॉमेडीची सुद्धा चलती आहे. कॉमेडी चित्रपटांना पूर्वीपासूनच प्रेक्षक पाठिंबा देत आले असून आधुनिक काळात तरुण दिग्दर्शकांबरोबर तरुण कलाकारांची फळीदेखील ‘मॅड’ विनोदाने प्रेक्षकांचे मनोरंजन करीत आहेत. युथ अर्थात तरुणाई या शब्दातच एक वेगळी एनर्जी आहे, ऊर्जा आहे. तारुण्यात एक वेगळाच मॅडनेस प्रत्येकात भरलेला असतो. या मॅडनेसमधूनच कधी कधी कल्पनेपलीकडच्या अतर्क्य गोष्टी घडत असतात. असाच अतर्क्य असलेला ‘मॅड’ हा युथफूल, कलरफूल आणि रोमँटिक कॉमेडी चित्रपट प्रेक्षकांच्या मनोरंजनासाठी येतोय.
![कॉमेडी चित्रपट, ‘मॅड’!](https://etvbharatimages.akamaized.net/etvbharat/prod-images/mh-mum-ent-ritika-shrotri-vinayak-mali-mad-mhc10001_11092021165421_1109f_1631359461_160.jpeg)
डार्लिंग ह्या बहुचर्चित चित्रपटाची टीम तितक्याच उत्साहात ‘मॅड’ हा रोमॅंटिक कॉमेडी चित्रपट घेऊन प्रेक्षकांच्या मनोरंजनसाठी सज्ज झाली आहे. समीर आशा पाटील पिक्चर्स आणि कथाकार मोशन पिक्चर्स यांच्या संयुक्त विद्यमाने या चित्रपटाची निर्मिती करण्यात येणार आहे. समीर आशा पाटील आणि व्ही. जे. शलाका हे या चित्रपटाचे निर्माते आहेत.
या चित्रपटाच्या निमित्ताने हटके आणि फ्रेश जोड़ी प्रेक्षकांच्या समोर येणार आहे. अल्पावधीतच आपल्या उत्तम अभिनय कौशल्याने प्रेक्षकांची मने जिंकणारी अभिनेत्री रितिका श्रोत्री आणि सोशल मीडियाच्या माध्यमातून आपली वेगळी ओळख निर्माण केलेला विनायक माळी ऊर्फ दादूस यांची रोमँटिक सफर 'मॅड’ या चित्रपटातून अनुभवता येणार आहे. विनायक माळी वेगळ्याच अतरंगी अंदाजात ह्या चित्रपटातून रूपेरी पडद्यावर पदार्पण करणार आहे. ठसकेबाज लव्हेबल रितिका श्रोत्री आणि अतरंगी विनायक माळी हे भन्नाट समीकरण चित्रपटाची रंगत चांगलीच वाढवतील हे नक्की.
![कॉमेडी चित्रपट, ‘मॅड’!](https://etvbharatimages.akamaized.net/etvbharat/prod-images/mh-mum-ent-ritika-shrotri-vinayak-mali-mad-mhc10001_11092021165421_1109f_1631359461_611.jpeg)