भारताच्या संविधानाचे जनक डॉ बाबासाहेब आंबेडकर यांचा जीवनपट एण्‍ड टीव्‍हीवरील 'एक महानायक डॉ. बी. आर. आम्‍बेडकर’ या मालिकेतून उलगडला जातोय. वैविध्‍यपूर्ण व लक्षवेधक पटकथा व प्रतिभावान कलाकार यांच्यामुळे ही मालिका झपाट्याने लोकप्रियतेच्‍या शिखरावर पोहोचली आहे. आतापर्यंत बाबासाहेबांच्या लहानपणावर कथानक केंद्रित होते. परंतु आता पटकथा नवीन वळण घेणार आहे आणि बाबासाहेब आणि रमाबाई यांच्या तरुणपणीचे चित्रण होणार आहे. त्यासाठी दोन तरुण कलाकारांची निवडही झाली आहे. आता अभिनेता अथर्व कर्वे व अभिनेत्री श्रावणी अभंग तरुण बाबासाहेब आणि रमाबाई च्या भूमिकेत दिसणार आहेत. ही दोन्ही कलाकारांसाठी सुवर्णसंधी आहे आणि ते या भूमिका साकारण्यासाठी खूप उत्सुक आहेत.
जेथे तरूण 'भीमराव आंबेडकर'ची भूमिका साकारण्‍याची अथर्व कर्वेची निवड करण्‍यात आली आहे आणि श्रावणी अभंग 'रमाबाई आंबेडकर'ची भूमिका साकारणार आहे. नवीन पिढी, नवीन शहर, नवीन विचार पण भेदभाव-असमानतेमध्‍ये काहीच बदल नाही. भीमराव असमानतेविरोधात संघर्ष सुरू ठेवणार आहेत, आणि त्यांच्या या सामाजिक व न्‍यायाच्‍या संघर्षामध्‍ये भीमरावांना पाठिंबा कोणकोण देणार हे पाहणे प्रेक्षकांसाठी उत्सुकतेचे असेल.
भीमराव आंबेडकरांची भूमिका साकारण्‍याबाबत अथर्व कर्वे म्हणाला, ''बाबासाहेबांचे जीवन व वारसा अनेकांसाठी प्रेरणास्रोत राहिले आहे. त्यांची प्रतिभा व यशस्‍वी कामगिरीची यादी अतुलनीय आहे. उत्तम विचारवंत, नेते, सामाजिक सुधारक, कट्टर राष्‍ट्रप्रेमी व अर्थशास्‍त्रज्ञ आणि सर्वात महत्त्वाचे म्‍हणजे भारतीय संविधानाचे शिल्‍पकार. त्यांची भूमिका साकारायला मिळणे स्वप्नवत आहे. प्रेरणादायी नेते डॉ. बी. आर. आंबेडकर यांची भूमिका साकारण्यासाठी निवड होणे हा मोठा सन्‍मान आहे. ते सर्वोत्तम नेते होते आणि त्‍यांचा वारसा अद्वितीय आहे. त्‍यांच्‍यासारखे व्‍यक्तिमत्त्व कोणाचेच नाही आणि समाजाप्रती त्‍यांनी दिलेले योगदान उल्‍लेखनीय आहे. अशी प्रभावी भूमिका साकारणे मोठी जबाबदारी आहे आणि माझ्यासाठी हा मोठा क्षण आहे. डॉ. आंबेडकरांची पुस्‍तके व कार्यांनी मला खूप प्रेरित केले आहे. मी त्‍यांच्‍याबाबत खूप काही वाचत मोठा झालो आहे.”
रमाबाई आंबेडकरांच्‍या भूमिकेत दिसण्‍यात येणारी श्रावणी अभंग म्हणाली, ''रमाबाई भीमराव आंबेडकर सामाजिक न्‍यायाचे द्योतक डॉ. भीमराव आंबेडकरांसाठी महत्त्वपूर्ण प्रेरणास्रोत राहिल्‍या आहेत. सर्वांना रमाबाईंबाबत खूपच कमी माहित आहे. म्‍हणूनच या मालिकेच्‍या माध्‍यमातून प्रेक्षकांना त्‍यांच्‍याबाबत आणि त्‍यांनी बाबासाहेबांच्या जीवनात बजावलेल्‍या भूमिकेबाबत माहित होईल. मला ही भूमिका साकारण्‍याची आणि प्रेरणादायी मालिकेची भाग होण्‍याची ही संधी दिल्‍यामुळे खूपच सन्‍माननीय वाटत आहे.”
अथर्व पुढे म्हणाला की, ‘डॉ. आंबेडकरांची भूमिका साकारायला मिळेल असे वाटले नव्हते. सध्या मी भूमिकेचा सखोल अभ्यास करीत आहे. मी त्‍यांच्‍याबाबत अधिकाधिक माहिती जाणून घेण्‍यासाठी त्यांच्या आयुष्याबाबत वाचन करीत आहे. वाचनासोबत मी मोकळ्या वेळेमध्‍ये त्‍यांच्‍यावर बनवण्‍यात आलेले विविध लघुपट देखील पाहण्‍याचा प्रयत्‍न करतो. त्‍यानी दिलेल्‍या शिकवणींबाबत प्रकाशित करण्‍यात आलेले विविध लेख, त्‍यांचे आत्‍मचरित्र यांचा संदर्भ घेण्‍यासोबत आम्‍ही प्रख्‍यात संशोधक देखील निवडले आहेत, जे मला डॉ. बी. आर. आंबेडकर यांच्‍याबाबत खूप माहिती सांगत आहेत. डॉ आंबेडकर साकारायला मी उत्सुक आहे.''
श्रावणी पुढे म्हणाली, ‘रमाबाई आंबेडकर या बाबासाहेबांना पाठिंबा देण्‍यासाठी त्‍यांच्‍यामागे खंबीरपणे उभ्‍या राहिल्‍या. त्‍या नम्रता, प्रामाणिकपणा व करूणेच्‍या प्रतीक होत्‍या. रमाबाई आंबेडकर यांच्‍याकडून शिकण्‍यासारखे भरपूर काही आहे. मी रमाबाईंची भूमिका साकारण्यासाठी निवडण्‍यात आल्‍याने स्‍वत:ला भाग्‍यवान समजते. ही प्रबळ भूमिका साकारण्‍याचा अनुभव अद्भुत आहे.”
'एक महानायक डॉ. बी. आर. आम्‍बेडकर' ही मालिका एण्‍ड टीव्हीवर प्रसारित होते.
हेही वाचा - जून : नैराश्यावर संवादातून सहज मात करता येतं हे दाखविणारा चित्रपट
