कलाकारांच्या जीवनात बरेच उतार-चढाव येत असतात. हल्लीची कलाकार मंडळी आपल्या शरीरावर कडक मेहनत घेताना दिसतेय. अभिनेते ‘सिक्स पॅक्स’ तर अभिनेत्री ‘झिरो फिगर’ मिळविण्यासाठी धडपडताना दिसतात. आपले मराठी कलाकारही यात मोडतात. आता अभिनेत्री मोनालिसा बागलचं उदाहरण घ्या ना. ही सुंदर अभिनेत्री नेहमीच फिट होती तरीही तिने लॉकडाऊन मध्ये ‘टाइम-पास’ म्हणून चक्क आपलं वजन घटवलं, ज्याचा तिला पुढील प्रोजेक्टस साठी उपयोगी पडेल.
नवीन वर्षात सर्वकाही सुरळीत चालू होते. सिनेमाचे शूटिंग सुरू झाले होते. नवीन वर्षाची नवी उमेद मिळाली होती. आणि असं असताना सिनेसृष्टीला देखील ब्रेक लागला. गेल्या वर्षीच्या लॉकडाऊनमुळे मिळालेल्या वेळेचा मोनालिसा बागलने पुरेपूर वापर केला, स्वतःला वेळ दिला, आरोग्याची काळजी घेतली. तिने वजन कमी करण्याकडे विशेष लक्ष दिले.
त्यावेळी एका सिनेमासाठी ती वजन कमी करत होती आणि पुन्हा लॉकडाऊन आला. पण आता मिळालेल्या वेळेचा सदुपयोग करत, फिटनेसकडे पूर्णपणे लक्ष देत, योग्य डाएट करून मोनालिसा कमी केलेले वजन तसेच मेन्टेन करण्याकडे विशेष लक्ष देतेय.
“आपण सर्वच जण लॉकडाऊन पाठोपाठ लॉकडाऊन अनुभवतोय. अनेक ठिकाणी कामांना पुन्हा ब्रेक लागला आहे. वर्क फ्रॉम होम सुरू झाल्यामुळे पुन्हा अनेकांना घरून काम करावे लागतेय त्यामुळे 'जग थांबलंय' ही भावना पुन्हा एकदा बऱ्याच जणांच्या मनात सतत येतेय हे सोशल मीडियावरून लक्षात येते. लॉकडाऊनमध्ये आपण काय करू शकतो तर आपण घराबाहेर न पडता स्वतःची काळजी आणि इतरांची काळजी घेऊ शकतो. घरी बसल्या आपल्याला आवडेल त्या गोष्टी करून आपलं मन गुंतवून ठेवू शकतो.र्व काही सुरळीतपणे पुन्हा सुरू होईल असा विश्वास बाळगा. यासाठी एकच उपाय म्हणजे 'संयम'”, असं अभिनेत्री मोनालिसा बागल म्हणाली.
मोनालिसा ही सोशल मीडियावर खूप सक्रिय आहे. मध्यंतरी तिच्या फोटोंवरून, इंस्टाग्राम रिल्सवर चाहत्यांच्या उड्या पडत होत्या. आता वजन कमी केल्यानंतरचे नवीन स्टायलिश आणि ट्रेडिशनल फोटो मोनालिसाने शेअर केले आहेत.
अर्थात, मोनालिसा बगलचे नवीन फोटोज् आणि तिच्या या नवीन लूक साठी तिच्यावर कौतुकाचा वर्षाव होतोय.
हेही वाचा - मराठी अभिनेते पुंडलिक पालवे यांचा कोरोनाने घेतला बळी
