कोरोनाच्या दुसऱ्या लाटेमुळे महाराष्ट्रात लॉकडाऊन सदृश जनता कर्फ्यू लावण्यात आला. त्यामुळे चित्रपटगृहे बंद झाली तसेच कुठल्याही चित्रीकरणावर बंदी असल्यामुळे मनोरंजनसृष्टीवर पुन्हा एकदा अवकळा आली. त्यातल्या त्यात काही मालिका निर्माते महाराष्ट्राबाहेर जाऊन शूटिंग करू लागले व छोट्या पडद्यावरील मनोरंजनाचा स्रोत सुरु राहिला. महाराष्ट्रात किंबहुना मुंबईत सर्वात जास्त शुटिंग्स होत असतात व त्यामुळे अनेक निर्मितीसंस्थांच्या चित्रपटांचे काम अडकून पडले आहे. यातच रोजंदारीवर काम करणारे कामगार, छोट्यामोठ्या भूमिका करणारे सहकलाकार यांचे हाल सुरु असून तिकडे कोणीच लक्ष देत नाहीये. तसेच भले काही मालिका राज्याबाहेर चित्रित होत असतील परंतु निर्मात्यांनी मोजक्याच लोकांना तिथे नेलंय त्यामुळे अनेकांचे रोजगार बुडालेत. आता तर प्रमुख अभिनेते-अभिनेत्री यांनादेखील लॉकडाऊनची झळ बसू लागलीय आणि त्यांनी नोंदणी केलेल्या फिल्म युनियन्सना यावर तोडगा काढण्यास सांगितले आहे.
बॉलिवूडमधील मोठमोठे स्टार्स परदेशात जाऊन शूटिंग करू शकतात परंतु हे सर्वांनाच शक्य नाही. त्यातच प्रमुख मुद्दा लाखो लोकांच्या रोजगाराचा आहे. त्यामुळे FWICE या सर्वात मोठ्या फिल्म युनियनने, जिचे मनोरंजनसृष्टीतील जवळपास सर्वच सभासद आहेत, मुख्यमंत्री उद्धव ठाकरे यांना नुकतेच एक पत्र पाठविले असून मनोरंजनसृष्टीलासुद्धा लवकरात लवकर काम सुरु करू देण्याची विनंती केली आहे. त्यांच्या पत्राचा स्वैर अनुवाद.....
‘आम्ही तुम्हाला अनेक पत्रांद्वारे विनंत्या केल्या की मनोरंजनसृष्टीलाही काम सुरु करण्याची मुभा द्यावी परंतु आपल्या ऑफिसमधून आमच्या एकाही पत्राला उत्तर देण्याची तसदी घेण्यात आलेली नाही. FWICE आणि मनोरंजनसृष्टीची कोऑर्डिनेशन कमिटी यांनाही कुठल्याही प्रकारचा निर्णय कळविण्यात आलेला नाहीये.
सर, आमच्या ‘इंडस्ट्रीत’ काम करणारे लाखो लोकं बेरोजगार झालेत आणि गेल्या दीडेक वर्षांत त्यांच्याकडे काम नसल्यामुळे, अर्थातच लॉकडाऊन मुळे सगळंच बंद असल्याकारणाने, त्यांच्यावर आणि त्याच्यावर अवलंबित कुटुंबियांवर उपासमारीची वेळ आली आहे. आमची इंडस्ट्री लाखो लोकांना रोजगार उपलब्ध करून देते परंतु या काळात सर्वच ठप्प आहे आणि त्यांच्याकडे अर्थार्जनाचे इतर पर्यायसुद्धा नाहीत. कामगारच नव्हे तर निर्मात्यांनाही लॉकडाऊनची झळ बसली आहे. त्यांनी प्रोजेक्ट्स मध्ये केलेल्या मोठ्या इनव्हेसमेंट्स अडकून पडल्या आहेत आणि जिथपर्यंत ते पूर्ण होत नाहीत तोपर्यन्त नुकसानच नुकसान आहे.
FWICE तर्फे आम्ही ३२ प्रकारच्या क्राफ्ट्सना रिप्रेझेन्ट करतो ज्यात कामगार, तंत्रज्ञ आणि कलाकारांचा समावेश आहे. आम्हाला दिवसाला शेकडो फोन्स येतात की इंडस्ट्री कधी सुरु होतेय, आम्ही हलाखीच्या परिस्थिती जगतोय, कलाकारांच्या सेव्हिंग्स संपत आल्या आहेत ई. खरंतर आम्ही या कठीण प्रसंगातही लोकांचे मनोरंजन करतंच आहोत आणि त्यामुळे घरी बसलेल्या लोकांचे मानसिक आरोग्य चांगले राहण्यास मदत होत आहे. आम्ही इतके चांगले कार्य करीत असताना आमच्यावर लादलेली बंधनं कृपया हटविण्यात यावी जेणेकरून आमच्या इंडस्ट्रीतील लोकांनाही रोजगार मिळू शकेल आणि त्यांच्या कुटुंबीयांची उपासमार होणार नाही.
आम्ही ग्वाही देतो की आम्ही शासनाने आखून दिलेल्या ‘एसओपी’ अंतर्गतच काम करू आणि सर्व कोरोना प्रोटोकॉल चे पालन करू. आमची मनापासून इच्छा आहे की तुम्ही यात लक्ष घालून लवकरात लवकर मनोरंजनसृष्टीला महाराष्ट्रात पुन्हा कार्यरत होण्याची अनुमती द्यावी.’
हेही वाचा - कोविड नियम उल्लंघनासाठी टायगर श्रॉफ आणि दिशा पाटणी वर गुन्हा दाखल
