मुंबई - बॉलिवूडची तगडी स्टारकास्ट असलेला 'कलंक' चित्रपटाकडून प्रेक्षकांना फार अपेक्षा होत्या. भव्यदिव्य सेट्स, गाणी आणि विशेष म्हणजे मोठे कलाकार असुनही या चित्रपटाकडे प्रेक्षकांनी पाठ फिरवली. वरुण धवनच्या करिअरमधला हा पहिला फ्लॉप चित्रपट ठरला. त्यामुळे त्याने पहिल्यांदाच या चित्रपटाबाबत आपलं मत व्यक्त केलं आहे.
दिग्दर्शक अभिषेक वर्मन यांनी या चित्रपटाचं दिग्दर्शन केलं होतं. तर, करण जोहरच्या 'धर्मा प्रोडक्शन' अंतर्गत या चित्रपटाची निर्मिती करण्यात आली होती. पहिल्या दिवशी या चित्रपटाने चांगली कमाई केली होती. मात्र, त्यानंतर या चित्रपटाला उतरती कळा लागली होती.
एका माध्यमाशी बोलताना वरुणने या चित्रपटाच्या अपयशाबद्दल पहिल्यांदा त्याचं मत व्यक्त केलं. हा चित्रपट चालण्यासारखा नव्हताच. कारण, हा चित्रपट प्रेक्षकांना आवडला नाही. या चित्रपटाचं अपयश हे माझ्यासाठी एक धडा आहे', असं तो म्हणाला.
'पहिल्यांदाच मी अपयशाला सामोरे गेलो आहे. मला माझ्या चित्रपटांवर फार प्रेम असतं. मात्र, काहीवेळा काही गोष्टी ठिक नसतात. यातून आपल्याला धडा मिळतो', असेही तो यावेळी म्हणाला.
वरुण धवनने आत्तापर्यंत ११ चित्रपटात भूमिका साकारली आहे. हे सर्व चित्रपट बॉक्स ऑफिसवर हिट ठरले. मात्र, 'कलंक' चित्रपट हा त्याच्या करिअरमधला पहिला फ्लॉप चित्रपट ठरला आहे.
आता तो त्याच्या आगामी 'स्ट्रिट डान्सर' आणि 'कुली नंबर १' या चित्रपटाच्या शूटिंगमध्ये व्यस्त आहे. त्याचा 'स्ट्रिट डान्सर' हा चित्रपट पुढच्या वर्षी २४ जानेवारीला प्रदर्शित होईल.
