मुंबई - अभिनेता शाहिद कपूरचा 'कबिर सिंग' चित्रपट २१ जूनला प्रदर्शित झाला. या चित्रपटाला चाहत्यांचा चांगला प्रतिसाद मिळत आहे. पहिल्याच दिवशी या चित्रपटाने बॉक्स ऑफिसवर २१ कोटींचा गल्ला जमवला आहे. हा चित्रपट शाहिदच्या करिअरमधला सर्वाधिक ओपनिंग करणारा चित्रपट ठरला आहे. असे असले, तरीही बॉलिवूडच्या एका गायिकेने मात्र, या चित्रपटावर आक्षेप घेत आपला राग व्यक्त केला आहे. सोशल मीडियाच्या माध्यमातून तिने या चित्रपटावर चांगलीच टीका केली आहे.
बॉलिवूडमध्ये नेहमी आपल्या वादग्रस्त ट्विटमुळे गायिका सोना मोहापात्रा ही चर्चेत असते. बॉलिवूडच्या बऱ्याच कलाकारांना फैलावर घेत ती त्यांच्याबद्दल ट्विट करत असते. आता शाहिदच्या 'कबिर सिंग' चित्रपटातील भडक दृष्यांवरही तिने आक्षेप घेत ट्विट केले आहे.
'फक्त अभिनयाच्या जोरावर तुम्ही हा चित्रपट पाहू इच्छिता. मात्र, कोणीही महिला विरोधी किंवा पुरुषप्रधान कथा असलेल्या या चित्रपटावर आक्षेप का घेतला नाही. हे खूप त्रासदायक आहे'. असे तिने तिच्या एका ट्विटमध्ये लिहिले आहे. तर, अभिनेता नकुल मेहताच्या एका ट्विटवर रिप्लाय देत तिने लिहिलेय, की 'आपली भूमिका निवडण्यापूर्वी कलाकारांची काही जबाबदारी असते की नाही. त्यांना आपली जबाबदारी समजायला हवी'.
सोनाने आत्तापर्यंत बऱ्याच कलाकारांवर निशाणा साधला आहे. अलिकडेच सलमान खानवरही तिने टीका केली होती. त्यासोबतच प्रियांका चोप्राची पाठराखण करत तिने सलमान खानला चांगलेच सुनावले होते. तसेच, काळविट शिकार प्रकरणानंतरही तिने सलमान बाबत उपरोधिक ट्विट केले होते.
