मुंबई - अभिनेता नवाजुद्दीन सिद्दिकी आजवर वेगवेगळ्या भूमिकेतून प्रेक्षकांच्या भेटीला आला आहे. त्याच्या अभिनयाच्या जोरावर त्याने प्रेक्षकांमध्ये आपली वेगळी ओळख निर्माण केली आहे. बॉलिवूडच्या अनेक बड्या कलाकारांच्या यादीत त्याने आपले स्थान मिळवले आहे. आता लवकरच तो पुन्हा एकदा मोठ्या पडद्यावर झळकण्यासाठी सज्ज झाला आहे.
'बोले चुडीयां' या आगामी चित्रपटातून नवाजुद्दीन प्रेक्षकांच्या भेटीला येणार आहे. या चित्रपटात त्याच्यासोबत मौनी रॉय ही अभिनेत्री झळकणार आहे. विशेष म्हणजे, मौनी आणि नवाजुद्दीन पहिल्यांदाच एकत्र पडद्यावर झळकणार आहेत. चित्रपट समीक्षक तरण आदर्श यांनी सोशल मीडियावर या चित्रपटाचे एक पोस्टर शेअर केले आहे. यामध्ये दोघांचीही फर्स्ट लूक पाहायला मिळतो. या चित्रपटाचे दिग्दर्शन नवाजुद्दीनचा भाऊ शमास नवाब सिद्दिकी हेच करत आहेत. त्यांचा हा पहीला दिग्दर्शनीय चित्रपट आहे. राजेश भाटीया आणि करण भाटीया या चित्रपटाची निर्मिती करत आहेत.
मौनी रॉयने टीव्ही मालिकांमधून मोठ्या पडद्यावर एन्ट्री घेतली होती. अक्षय कुमार सोबत तिला 'गोल्ड' चित्रपटात भूमिका साकारण्याची संधी मिळाली होती. तिच्या या पहिल्याच चित्रपटाने बॉक्स ऑफिसवर १०० कोटी क्लबमध्ये एन्ट्री घेतली होती. त्यामुळे मौनीला आपल्या चित्रपटात घेण्यासाठी बऱ्याच दिग्दर्शकांच्या रांगा लागल्या होत्या. आगामी 'ब्रम्हास्त्र' या चित्रपटातही ती झळकणार आहे. आता 'बोले चुडीयां' चित्रपटात तिची आणि नवाजुद्दीनची कशाप्रकारे भूमिका असणार आहे, याची चाहत्यांना उत्सुकता आहे. या चित्रपटाची शूटिंग जून महिन्यात सुरू होईल. पुढच्या वर्षी हा चित्रपट प्रदर्शित होईल.
