मुंबई - बऱ्याचदा एखाद्या चित्रपटासाठी दिग्दर्शक वेगवेगळ्या कलाकारांशी चर्चा करत असतात. मात्र, बरेचसे कलाकार हे आधीच दुसऱ्या कामात व्यग्र असल्याने काही चित्रपट करू शकत नाहीत. त्यांच्या जागी दुसऱ्या कलाकाराची वर्णी लागते. आता अनुराग बासूचा 'इमली' हा चित्रपट दीपिका पदूकोण करणार अशी चर्चा सध्या बॉलिवूडमध्ये सुरू आहे. यापूर्वी हा चित्रपट कंगना रनौत करणार होती. मात्र, आता तिने हा चित्रपट करण्यास नकार दिला आहे.
कंगनाने चित्रपट सोडल्यानंतर या चित्रपटात दीपिका पदुकोणच्या नावाची चर्चा सुरू आहे. तिच्याशी याबाबत दिग्दर्शकाने संपर्क साधला आहे. दीपिकालाही या चित्रपटाती कथा आवडली आहे. मात्र, याबाबत अद्याप तिने काहीही जाहिर केले नाही.
लवकरच कंगना आपल्या स्वत:च्या चित्रपटाची घोषणा करणार आहे. हा चित्रपट स्वत: कंगना दिग्दर्शित करत आहे. त्यामुळेच कंगनाने 'इमली' करायला नकार दिला आहे. त्यामुळे मेकर्सनी दीपिकाशी संपर्क साधला. आता दीपिका हा चित्रपट साईन करते की नकार देते, याकडे चाहत्यांचे लक्ष लागले आहे.
सध्या दीपिका 'छपाक' या चित्रपटाच्या शूटिंगमध्ये व्यस्त आहे. यात ती अ‍ॅसिड हल्ल्यातील पीडिता लक्ष्मी अग्रवाल हिची भूमिका साकारताना दिसेल. या चित्रपटाचे पोस्टर आणि बरेचसे सीन सोशल मीडियावर पाहायला मिळतात.
