मुंबई - सर्वच शहरांमध्ये सिग्नल तोडणाऱ्यांची संख्या भरपूर असते. यातून अपघातही होतात. यावर मात करण्याचा प्रयत्न हैदराबाद ट्रॅफिक पोलिसांनी केला आहे. आपल्या ट्विटरवर एक व्हिडिओ शेअर करीत अमिताभ बच्चन यांनी पोलिसांच्या या उपक्रमाचे कौतुक केले आहे.
हैदराबाद ट्रॅफिक पोलिसांनी नियमांचे उल्लंघन करणाऱ्यांसाठी खबरदारी म्हणून एक उपक्रम सुरू केलाय. या अंतर्गत त्यांनी झेब्रा क्रॉसिंगवर एलईडी लाईट्स लावले आहेत. सिग्नलनुसार लाला, पिवळा आणि हिरव्या कलरमध्ये हे लाईट्स लागतात. त्यामुळे सिग्नल मोडणाऱ्यांच्या संख्येला आळा बसला आहे.
इतकेच नाही, तर लाईट्स स्पीडब्रेकरसारखेही काम करतात. रस्त्यावर एलईडी लाईट्स वापरण्याची ही भारतातील पहिलीच पध्दत ठरली आहे. सोशल मीडियावर हा व्हिडिओ चांगलाच व्हायरल झाला आहे.
एका युजरने अमिताभ यांना टॅग करुन हा व्हिडिओ पाठवलाय. याला उत्तर द्यायला अमिताभ विसरलेले नाहीत. त्यांनी लिहिलंय, हा एक खूप उत्तम विचार आहे. यामुळे फार फायदा होईल.
अमिताभ बच्चन सध्या आगामी 'गुलाबो-सिताबो'च्या शूटींगमध्ये बिझी आहेत. यात ते एका वृध्दाची भूमिका साकारत आहेत.
