मुंबई - अभिनेता संजय दत्तनं 'बाबा' या सिनेमाच्या माध्यमातून मराठी चित्रपटसृष्टीत पदार्पण केलं. संजय दत्तची निर्मिती असलेला हा सिनेमा भारतात २ ऑगस्टला प्रदर्शित झाला. चित्रपटाला प्रेक्षकांचा चांगला प्रतिसादही मिळाला. यानंतर आता हा चित्रपट दक्षिण कोरियातदेखील प्रदर्शित करण्यात आला आहे.
'भावनेला भाषा नसते', अशी दमदार टॅगलाईन असलेल्या 'बाबा' चित्रपटातून वडील आणि मुलाचे अबोल नाते उलगडण्यात आले आहे. आपल्या मुलासाठी संघर्ष करणारा 'बाबा' या चित्रपटात पाहायला मिळतो. प्रत्येक सामान्य व्यक्तीला आपलासा वाटणारा हा प्रवास प्रेक्षकांच्या पसंतीस उतरला.
सिनेमात अभिनेता दीपक दोबरियाल, नंदीता धुरी, अभिजीत खांडकेकर, स्पृहा जोशी आणि बालकलाकार आर्यन मेघजी यांच्या मुख्य भूमिका आहेत. दरम्यान या चित्रपटाची 'गोल्डन ग्लोब २०२०' साठी विदेशी भाषा या श्रेणीमध्येदेखील निवड करण्यात आली आहे.
