मुंबई - बॉलिवूड अभिनेत्री शिल्पा शेट्टीला १४ वर्षे जुन्या चुंबन प्रकरणात ( Shilpa Shetty Kissing Case ) दिलासा मिळाला आहे. तिच्यावर अश्लीलता पसरवल्याचा आरोप होता. 2007 मध्ये हॉलिवूड अभिनेता रिचर्ड गेरे ( Hollywood actor Richard Gere ) यांनी एका कार्यक्रमात शिल्पा शेट्टीचे खुलेआम चुंबन घेतले होते. त्यानंतर त्याचे हे चुंबन अनेक वादात सापडले होते. रिचर्ड गेरे आणि शिल्पा शेट्टी यांच्यावर अश्लीलता पसरवल्याप्रकरणी गुन्हा दाखल करण्यात आला होता.
आता या प्रकरणी अभिनेत्रीची निर्दोष मुक्तता करण्यात आली आहे. मेट्रोपॉलिटन मॅजिस्ट्रेट केतकी चव्हाण ( Magistrate Ketki Chavan ) यांनी शिल्पा शेट्टीची या प्रकरणात निर्दोष मुक्तता केली आहे. न्यायदंडाधिकारी म्हणाले की, या प्रकरणात अभिनेत्री आरोपी नसून रिचर्ड गेरेची पीडित आहे. दंडाधिकाऱ्यांच्या म्हणण्यानुसार शिल्पा शेट्टीवरील आरोप निराधार आहेत. त्यामुळे अभिनेत्रीची आरोपातून निर्दोष मुक्तता करण्यात आली.
दंडाधिकाऱ्यांनी आपल्या जबाबात म्हटले आहे की, तक्रारीत शिल्पा शेट्टीचा कोणत्याही प्रकारचा गुन्हेगार असल्याचे आढळून आलेले नाही. हे लक्षात घेण्यासारखे आहे की रिचर्ड गेरेने 2007 मध्ये शिल्पा शेट्टीचे चुंबन घेतले तेव्हा उत्तर प्रदेश आणि राजस्थानमध्ये त्याच्याविरोधात तक्रारी दाखल झाल्या होत्या. या घटनेनंतर राजस्थानमधील मुंडावार येथील प्रथम श्रेणी न्यायदंडाधिकारी यांच्याकडे तक्रार दाखल करण्यात आली होती आणि शिल्पा शेट्टी आणि रिचर्ड गेरे यांच्याविरुद्ध एफआयआर नोंदवण्याची मागणी करण्यात आली होती, जी मंजूर करण्यात आली.
त्यानंतर शिल्पा शेट्टी आणि रिचर्ड गेरे यांच्याविरुद्ध माहिती तंत्रज्ञान आणि महिलांचे अशोभनीय प्रतिनिधित्व (प्रतिबंध) कायद्याच्या तरतुदींसह आयपीसी कलम २९२, २९३, २९४ (अश्लीलता) अंतर्गत गुन्हा दाखल करण्यात आला. त्याचवेळी शिल्पा शेट्टीने सुप्रीम कोर्टात याचिका दाखल करून हे प्रकरण मुंबईला हलवण्याचे आवाहन केले होते, जे 2017 मध्ये कोर्टाने मान्य केले होते. यानंतर मुंबईतील बॅलार्ड पिअर येथील महानगर दंडाधिकारी यांच्याकडे तक्रार आणि बदली प्रकरणाची सुनावणी सुरू होती.
शिल्पा शेट्टीचे वकील मधुकर दळवी यांच्या म्हणण्यानुसार, त्यांची फौजदारी प्रक्रिया संहितेच्या कलम २३९ (पोलिस अहवाल आणि कागदपत्रांचा विचार केल्यानंतर निर्दोष मुक्तता) आणि २४५ (पुरावा विचारात घेतल्यानंतर निर्दोष मुक्तता) करण्यात आली आहे. दुसरीकडे शिल्पा शेट्टीने आपल्या याचिकेद्वारे न्यायालयाला सांगितले होते की, तिची एकच चूक होती की तिने रिचर्ड गेरेच्या चुंबनाला विरोध केला नाही, हा गुन्हा असू शकत नाही.
हेही वाचा - कॅटरिना कैफने मालदीवमध्ये बनवले नवीन मित्र पाहा व्हिडिओ
