मुंबई - बॉलिवूड अभिनेता सुशांत सिंह राजपूतने रविवारी राहत्या घरी गळफास घेत आत्महत्या केली. या आत्महत्येचे कारण अद्याप अस्पष्ट आहे. अशात अभिनेत्याची शेवटची इन्स्टाग्राम पोस्ट सध्या चर्चेचा विषय ठरत आहे. सुशांतनं आपल्या इन्स्टाग्रामवरुन आईसोबतचा एक ब्लॅक अॅण्ड व्हाईट कोलाज फोटो शेअर करत भावनिक पोस्ट लिहिली आहे.
अभिनेत्यानं लिहिलं, 'अश्रुंमधून अंधूक दिसणारा भूतकाळ. हास्य नष्ट करणारी न संपणारी स्वप्ने आणि एक क्षणभंगुर जीवन. दोघांमधील संवाद'. एम एस धोनी सिनेमाच्या प्रदर्शनाआधी दिलेल्या एका मुलाखतीत सुशांतनं आईच्या आठवणींना उजाळा दिला होता. अभिनेता म्हणाला होता, आज माझं हे यश पाहण्यासाठी आई असायला हवी होती. तिला नक्कीच खूप आनंद झाला असता आणि माझा अभिमान वाटला असता.
पुढे सुशांत म्हणाला, ती असती तर कदाचित आज मी एक वेगळा व्यक्ती असतो. एखाद्या गोष्टीकडे पाहण्याचा माझा दृष्टीकोन आतापेक्षा खूप वेगळा असता. आज ज्या गोष्टींसाठी मी खूप उत्सुक असायला हवं, तितका मी नाही. आज ती या जगात असायला हवी होती. सुशांतच्या या वाक्यांवरुन तो आईसोबत भावनिकरित्या जोडला गेला होता हे समजते.
कामाबद्दल बोलायचं झाल्यास सुशांत शेवटचा नितेश तिवारी यांच्या छिछोरे सिनेमात झळकला होता. त्याचा हा सिनेमा सुपरहिट ठरला होता. सिनेमाने 100 कोटींचा गल्ला जमवला केला होता. विशेष म्हणजे या सिनेमातून त्यानं कोणत्याही परिस्थितीत खचून न जाता आत्महत्या न करण्याचा संदेश दिला होता.
