मुंबई - सध्या बॉलिवूडमध्ये दाक्षिणात्य चित्रपटसृष्टीबद्दल आकर्षण निर्माण झाले आहे. दक्षिणेच्या अनेक चिक्रपटांचे हिंदीमध्ये रिमेक होत असून त्यातील बरेच चित्रपट बॉक्स ऑफिसवर खणखणाटही करत आहेत. दक्षिणेत प्रसिद्ध असलेले हिरो-हिरॉईन बॉलिवूडमध्ये मोठ्या संख्येने पदार्पण करत आहेत. मात्र, सध्या चर्चा आहे ती दाक्षिणात्य सुपरस्टार आणि अर्जुन रेड्डी फेम विजय देवराकोंडाची. विजय देवराकोंडा करण जोहरच्या ‘लायगर‘ चित्रपटातून पदार्पण करत आहे. या चित्रपटाचे पोस्टर नुकतेच रिलीज करण्यात आले आहे.
खरेतर या चित्रपटाचे शूटिंग सुरू होणार होते. परंतु नाव ठरले नव्हते. या चित्रपटाचे दिग्दर्शन पुरी जगन्नाथ करत आहेत. जगन्नाथ यांनी अनेक सुपरहिट दाक्षिणात्य चित्रपट केले आहेत. लायगरमध्ये विजय देवरकोंडासोबत अनन्या पांडे असून हा रोमँटिक अ‍ॅक्शनपट आहे. रोनित बोस रॉय, रामया कृष्णन आणि विशू रेड्डी हेदेखील महत्वपूर्ण भूमिकांमधून दिसणार आहेत.
चित्रपटाची निर्मिती कारण जोहर करीत असून अपूर्व मेहता, पुरी जगन्नाथ व चार्म मी बॅनर यांचीसुद्धा निर्माते यादीत नावे आहेत. चित्रपटाचे नाव व पोस्टर प्रकाशित करताना करण जोहर म्हणाला, ‘मोठ्या पडद्याचे आणि प्रेक्षकांच्या हृदयाचे अधिपती विजय देवेराकोंडा आणि हॉट अनन्या पांडे यांचा ‘लायगर’ लवकरात लवकर प्रदर्शित करण्याची इच्छा आहे.’
या चित्रपटाच्या शीर्षकाबद्दल बोलायचे झाले तर हा शब्द ‘लायन’ आणि ‘टायगर’ चा मिलाफ असून पोस्टरवर #सालाक्रॉसब्रीड असे लिहिलेले आहे. थोडक्यात दोन्ही श्वापदांची ताकद ‘लायगर’ च्या नायकाकडून अपेक्षित आहे. हा चित्रपट हिंदी, तेलगू, तामिळ, कन्नड आणि मल्याळम या ५ भाषांमध्ये प्रदर्शित होईल.
हेही वाचा - 'गाबा'विजय : बीसीसीआयचं टीम इंडियाला ५ कोटींचं बक्षीस
