“या कलियुगात पैसा कोणाला नकोय आणि तो आपसूकच मिळत असेल तर ‘सोने पे सुहागा’. हल्ली पैश्याला अवाजवी महत्व प्राप्त झालंय. पूर्वी नातेसंबंधांना जास्त महत्व असायचे पण आता फार कमी प्रमाणात ते दिसते. समाजात हल्ली पैशालाच देव मानणारे अधिक आहेत. पैश्याचा हव्यास मनुष्याला कसे अधोगतीला घेऊन जाऊ शकतो आणि माणुसकी व प्रेम हे पैश्यापेक्षा नेहमीच वरचढ आहे असा संदेश आम्ही आमचा चित्रपट ‘कबाड - द कॉइन’ मधून देऊ इच्छितो. पैसा नसेल तरी खरं प्रेम कमी होत नाही आणि खूप पैसा असेल म्हणून खूप प्रेम मिळेल असेही नाही. हा चित्रपट पैशाच्या ‘ह्युमन सायकोलॉजी’ वर आधारित असून पैशालाच देव मानणाऱ्या लोकांना चपराक बसेल असा आहे. आणि आम्ही हे सर्व प्रामाणिकपणे, कुठलीही व्यावसायिक ऍडजस्टमेन्ट न करता, दर्शविण्याचा प्रयत्न केला आहे. यात नासिरुद्दीन आणि रत्ना पाठक शहा यांचा धाकटा मुलगा विवान शहा प्रमुख भूमिकेत असून त्याने ती भूमिका चोख बजावली आहे. दिग्दर्शक वरदराज स्वामी यांनी ही कथा अत्यंत तरलपणे हाताळली असून चित्रपटातील संदेश प्रेक्षकांना नक्कीच भावेल” असे चित्रपटाचे लेखक आणि असोसिएट डिरेक्टर शहजाद अहमद, आमचे प्रतिनिधी कीर्तिकुमार कदम यांच्याशी संवाद साधताना, म्हणाले.
शहजाद यांनी पुढे असे सांगितले की, “खरंतर हा एक रियॅलिस्टिक सिनेमा असून एक कबाडीवाला याचा हिरो आहे. बंधन, ज्याची भूमिका केलीय विवान शहाने, एक उच्चशिक्षित हुशार मुलगा आहे. त्याच्या वडिलांचे भंगार चे दुकान आहे. ‘प्रत्येक भंगारवाला एका अघटित सुवर्णदिनची वाट बघत असतो’ असे त्याचे वडील त्याला नेहमी सांगत. परंतु वडिलांच्या अकाली निधनानंतर बंधन नोकरीतून गुलामी करण्यापेक्षा वडिलोपार्जित कबाडीवाला बनण्यास अग्रक्रम देतो. रस्तोरस्ती हातगाडी घेऊन ‘भंगारवाला.....’ ओरडत फिरायला त्याला जराही कमीपणा वाटत नाही. त्याची बालपणीची मैत्रीण सविता, जिची भूमिका केलीय यशश्री मसुरकरने, जिचे वडील चांभार असतात, नेहमी त्याच्याकडून शिकत आयएएस बनण्याचे स्वप्न बघत असते. तसेच ती मनोमन बंधनवर प्रेमही करीत असते. एके दिवशी अचानकपणे त्याला एक पिशवी मिळते ज्यात मुघलकालीन सोन्याची नाणी असतात. खरंतर ही नाणी काही चोरांनी म्युझियममधून चोरलेली असतात व हाणामारीत पाण्यात फेकून दिलेली असतात. बंधन याबद्दल अनभिज्ञ असतो व त्यातील एक नाणे तो सविताच्या वडिलांना देतो ज्याचे त्यांना २ लाख रुपये मिळतात जे सविताच्या अभ्यासासाठी वापरले जातात. हातगाडी घेऊन फिरताना बंधन ला रस्त्यावर रोमा (झोया अफरोज) भेटते व त्याला भंगार घेण्यासाठी घरी बोलावते. त्याची हुशारी पाहून ती त्याला दुसरी अनेक कामे देते आणि त्यांच्या वरचेवर भेटीगाठी घडू लागतात. बंधन चक्क या सुंदर शहरी मुलीच्या प्रेमात पडतो. रोमाकडे तो व्यक्त होतो तेव्हा ती ते सर्व हसण्यावारी नेते आणि तो तिला आयुष्यभर खूष ठेवीन याचा पुरावा म्हणू एक नाणे देतो. एकेक नाण्याची किंमत एक -सव्वा करोडच्या घरात असते. रोमा आणि तिचा बॉयफ्रेंड झटपट श्रीमंत होण्यासाठी बंधन कडून मुघलकालीन नाणी बळकावण्याचा प्लॅन आखतात. पुढे प्रेम जिंकते की पैसा हे चित्रपटातून सविस्तररित्या मांडले आहे.”
शहजाद अहमद, नवाझुद्दीन सिद्दीकी अभिनित आणि केतन मेहता दिग्दर्शित, ‘मांझी : द माउंटन मॅन’ या चित्रपटाचेही लेखक आहेत आणि त्यांना हटके कथा लिहायला आणि दृश्यरूपात सांगायला आवडतात. ते ‘कबाड’ बद्दल हळवेपणाने बोलत होते. “आमचा हा चित्रपट थेट समाजात घडणाऱ्या घटनांपासून प्रेरित आहे. हा चित्रपट थ्रिलर लव्ह स्टोरी आहे आणि दिग्दर्शक वरदराज स्वामी (ज्यांच्यासोबत मी कथा, पटकथा आणि संवाद लिहिले आहेत) यांनी चित्रपटाला पूर्णतः न्याय दिला आहे. महत्वाचे म्हणजे आमचा हिरो चॉकलेट बॉय नाहीये की सुपरमॅनसारख्या करामती करणारा हिरो. तो अँटी-हिरो सुद्धा नाही. तो एक सामन्यातील सामान्य मनुष्य आहे. आणि गरीब असो वा श्रीमंत सगळ्यांसाठी भावना या सारख्याच असतात. दिग्दर्शकाने याच भावनाविश्वात खेळत कथानक पुढे सरकवत ठेवले आहे तसेच लव्ह-सॉंग्स वा आयटम-सॉंग्स याचा आसरा न घेता नाट्य उभे केले आहे. झोया अफरोज, यशश्री मसुरकर या सुंदर मुलींनी छान भूमिका साकारल्या असून विवान शहाने अप्रतिम अदाकारी पेश केली आहे. त्याच्या रक्तातच अभिनय आहे आणि त्याच्या आईवडिलांनीही आम्हाला नेहमीच प्रोत्साहित केले. विवानचा आवडता नट आहे आमिर खान आणि त्याच्या अभिनयात आमिरचा पगडा जाणवतो. महत्वाचं म्हणजे तो आमिरची नक्कल करीत नाही.”
सध्या महाराष्ट्रासकट अनेक राज्यात सिनेमागृहे बंद असल्यामुळे ‘कबाड - द कॉइन’ हा चित्रपट ‘एमएक्स-प्लेयर’ या ओटीटी प्लॅटफॉर्मवर प्रदर्शित करण्यात आला आहे.
हेही वाचा - Cyclone Tauktae LIVE Updates : तौक्तेची तीव्रता वाढली; मुंबईत लोकल वाहतूक ठप्प, विमान सेवेवरही परिणाम..
