मुंबई - सध्या प्रचंड व्यस्त असणारी जॅकलिन फर्नांडीझ एका चित्रपटाच्या सेटवरून दुसऱ्या चित्रपटाच्या सेटवर धावत पळत असते. खरेतर हे वर्ष तिच्यासाठी अत्यंत व्यस्त असून त्याबद्दल ती समाधानी आहे. जॅकलिन नेहमीच आपल्या समाज माध्यमांच्या हॅण्डल्सवरून आपल्या चाहत्यांशी संवाद साधत असते. हल्लीच ती अक्षय कुमार, क्रिती सॅनन, अर्शद वारसी, रितेश देशमुख आणि बॉबी देओल अशी तगडी पात्रयोजना असलेल्या ‘बच्चन पांडे’ च्या शूटसाठी राजस्थानमधील जैसलमेरला गेली होती.
हल्ली चित्रीकरणांमध्ये सुसूत्रता आली असून पूर्वीप्रमाणे शुटिंग्समध्ये वेळ दवडला जात नाही. याच व्यावसायिकतेमुळे चित्रपट वेळेत पूर्ण होतात. त्याच अनुषंगाने जॅकलिन फेर्नांडीझचे शूट वेळापत्रक ठरविले होते. तिचे चित्रपटातील काम संपले देखील आहे. तिला तिच्या पर्सनल टीमचा अभिमान आहे व त्यामुळेच शूटिंगच्या शेवटच्या दिवशी जॅकलिनने आपल्या ‘सर्वोत्कृष्ट’ टीमसोबत सेल्फी काढला व समाज माध्यमांवर तो वाळवंटातील सेल्फी म्हणून ट्रेंड झाला.
जॅकलिनने ‘गुडबाय जैसलमेर’ म्हणत सूर्यास्ताच्या वेळी काढलेला स्वत:चा एक फोटो पोस्ट केला, ज्यात तिने एक पारंपरिक राजस्थानी कशिदाकारी केलेला स्कर्ट आणि काळा ब्लाउज परिधान केलेला आहे. तसेच जॅकलिन राजस्थानी लोकसंगीतावर थिरकली आणि तेथील संस्कृतीचा आनंद लुटला. एकंदरीत तिचे वाळवंटातील वास्तव्य सुखदायक होते.
तिने ‘बच्चन पांडे’चे शूट पूर्ण केले असून ती लगेचच पुढच्या कामाला लागणार आहे. या सुंदर अभिनेत्रीकडे सध्या चार चित्रपट आहेत, त्यात, अक्षय कुमार आणि क्रिती सॅनन सोबत बच्चन पांडे, रणवीर सिंग सोबत रोहित शेट्टी दिग्दर्शित सर्कस, सैफ अली खान, यामी गौतम आणि अर्जुन कपूर यांच्यासोबत भूत पोलीस आणि सलमान खानची हिरॉईन म्हणून किक २, यांचा समावेश आहे.
हेही वाचा - IPL प्रेमींसाठी आनंदाची बातमी, आयपीएल २०२१ ची तारीख ठरली
