मुंबई - बॉलिवूड अभिनेता आदित्य पांचोली याच्या विरोधात मुंबईच्या वर्सोवा पोलीस ठाण्यात एका आघाडीच्या हिंदी चित्रपट अभिनेत्रीने बलात्काराचा गुन्हा दाखल केला होता. याप्रकरणी आदित्य पांचोलीने मुंबईतील अंधेरी न्यायालयात अटकपूर्व जामिनासाठी शुक्रवारी अर्ज दाखल केला होता. यावर सुनावणी देताना न्यायालयाने पांचोलीस 3 ऑगस्टपर्यंत अटक न करण्याचे आदेश दिले आहेत.
आदित्य पांचोलीवर बलात्काराचा गुन्हा दाखल करणारी आघाडीची हिंदी अभिनेत्री असून गेल्या काही वर्षांपासून आदित्य पंचोली आणि पीडित अभिनेत्रीमध्ये वाद सुरू आहेत. काही दिवसांपूर्वी या अभिनेत्रीच्या विरोधात आदित्य पांचोली आणि त्याच्या पत्नीने अंधेरी न्यायालयात मानहाणीचा दावा करणारी याचिका दाखल केली होती. यानंतर या अभिनेत्रीला न्यायालयाकडून समन्स बजावण्यात आले होते. दरम्यान अभिनेत्रीने दिलेल्या तक्रारीवरून वर्सोवा पोलिसांनी बलात्काराचा गुन्हा दाखल केला.
काय आहे प्रकरण -
2004 ते 2009 या दरम्यान आदित्य पंचोली याने पीडित महिलेला गुंगीचे औषध देऊन तिच्यावर बलात्कर केला होता. या दरम्यान अभिनेत्रीचे खासगी फोटो काढून ते तिच्या कुटुंबात सार्वजनिक करण्याची धमकी देत 1 कोटींची मागणी आदित्यने केली होती. यात आदित्यने आपल्याकडून 50 लाख रुपये घेतले असल्याचे पीडित अभिनेत्रीने तिच्या तक्रारीत म्हटले आहे.
