मॉस्को - रशियाचे अध्यक्ष वाल्दिमीर पुतीन यांनी डोनाल्ड ट्रम्प यांची पाठराखण केली आहे. ट्रम्प यांच्याविरोधातील महाभियोग हा मुद्दाम रचण्यात आलेला कट असल्याची टीका त्यांनी केली आहे. तसेच, हा अमेरिकेच्या राष्ट्राध्यक्षांचा शेवट नसल्याचेही त्यांनी म्हटले आहे.
महाभियोग प्रस्तावाबाबत अजून सिनेटमध्ये चाचणी होणे बाकी आहे. सिनेटमध्ये ट्रम्प यांच्या रिपब्लिकन पक्षाचे बहुमत आहे. मुद्दाम रचण्यात आलेल्या खोट्या मुद्द्यांच्या आधारावर आपल्याच पक्षाच्या प्रतिनिधीला ते नक्कीच अध्यक्षपदावरून हटवणार नाहीत, असे पुतीन यांनी म्हटले आहे. अमेरिकी संसदेच्या प्रतिनिधींच्या सभागृहात ट्रम्प यांच्या विरोधातील महाभियोगाला मान्यता मिळाली होती. त्यावर प्रतिक्रिया देताना पुतीन यांनी हे मत व्यक्त केले आहे. तसेच, महाभियोग प्रकरण हा अमेरिकेचा अंतर्गत मुद्दा आहे. ही केवळ दोन पक्षांमधील लढाई असल्याचेही ते म्हणाले.
ट्रम्प यांच्यावर आरोप आहे, की त्यांनी युक्रेनच्या अध्यक्षांना फोनवरून धमकी देत, जोई बिडेन यांच्याबाबत माहिती काढण्यास आणि त्यांच्यावर लक्ष ठेवण्यास सांगितले. बिडेन हे २०२० ला होणाऱ्या निवडणुकांमध्ये ट्रम्प यांचे मुख्य प्रतिस्पर्धी असणार आहेत. याबाबत विचारले असता, पुतीन यांनी हा सर्व डेमोक्रॅट पक्षाने रचलेला कट असल्याचे मत त्यांनी व्यक्त केले. याआधी ट्रम्प हे रशियाच्या मदतीने निवडून आल्याचा आरोपही त्यांनी (डेमोक्रॅट) राष्ट्राध्यक्षांवर केला होता. मात्र, त्याबाबत काहीही सिद्ध न करता आल्याने, डेमोक्रॅट नेत्यांनी हा नवा बनाव रचला आहे, असे ते म्हणाले.
हेही वाचा : डोनाल्ड ट्रम्प महाभियोग : प्रतिनिधींच्या सभागृहात प्रस्ताव मंजूर; आता 'सिनेट'मध्ये परिक्षा!
