मॉस्को : जगातील पहिली नोंदणीकृत कोरोना लस असलेल्या 'स्पुटनिक-व्ही'ची मानवी चाचणी सध्या सुरू आहे. यामध्ये सहभागी असणाऱ्या काही स्वयंसेवकांना कोरोनाची लागण झाल्याचे समोर आले आहे. रशियाच्या एका वृत्तवाहिनीने बुधवारी याबाबत माहिती दिली.
कोरोना लसीच्या मानवी चाचणीवेळी सहभागी स्वयंसेवकांपैकी काही सदस्यांना कोरोनाची लस दिली जाते, आणि बाकी सदस्यांना प्लासेबो दिला जातो. सध्या ज्या स्वयंसेवकांना कोरोनाची लागण झाली आहे, त्याला कोरोना लसीचा डोस दिला होता की प्लासेबो याबाबत माहिती समोर आली नाही. याबाबतचा तपास सुरू असल्याचे गामलेया नॅशनल रिसर्च सेंटरचे उपसंचालक डेनिस लॉगुनोव्ह यांनी दिली आहे.
ज्या स्वयंसेवकाला कोरोनाची लागण झाली आहे तो कदाचित लसीचा डोस दिलेल्या नाही, तर प्लासेबो दिलेल्या गटातला सदस्य असावा अशी शक्यता रिसर्च सेंटरचे संचालक अ‌ॅलेक्झँडर जिन्ट्सबर्ग यांनी व्यक्त केली आहे.
जगातील पहिली कोरोना लस..
११ ऑगस्टला रशियाने 'स्पुटनिक-व्ही'ची जगातील पहिली कोरोना लस म्हणून नोंद केली. सामान्यतः तीन टप्प्यांमधील मानवी चाचण्या पार पडल्यानंतरच लसीची नोंदणी करता येते. मात्र, तिसऱ्या टप्प्यातील चाचणी सुरुही झालेली नसताना रशियाने या लसीची नोंदणी केल्याबद्दल जगभरातून त्यावर टीका केली जात होती.
त्यानंतर सात सप्टेंबरपासून या लसीच्या नोंदणी-नंतरच्या मानवी चाचणीला सुरुवात झाली. या टप्प्यामध्ये एकूण ४० हजार स्वयंसेवकांचा सहभाग आहे. यांपैकी दहा हजार सदस्यांना प्लासेबो देण्यात येणार असल्याची माहिती रशियातील एका वृत्तसंस्थेने दिली.
इतर लसींमध्येही अडथळे..
१२ ऑक्टोबरला जॉन्सन अँड जॉन्सन कंपनीच्या कोरोना लसीची चाचणी थांबवण्यात आली होती. ही लस देण्यात आलेले काही लोक आजारी पडत असल्याचे दिसून आल्यामुळे ही चाचणी थांबवण्यात आली. मोठ्या प्रमाणात चाचण्या घेताना अशा प्रकारच्या घटना घडणे सर्वसाधारण बाब असल्याचे कंपनीने म्हटले आहे. तरीही, खबरदारी म्हणून पुढील सूचना मिळेपर्यंत लसीची चाचणी थांबवली असल्याचे कंपनीच्या अधिकाऱ्यांनी जाहीर केले.
चाचणी सुरूच राहणार
यापूर्वी ऑक्सफोर्ड विद्यापीठ आणि अ‌ॅस्ट्राझेनेका हे संयुक्तपणे तयार करत असलेल्या कोरोना लसीच्या चाचणीदरम्यान एका व्यक्तीचा मृत्यू झाला होता. ब्राझीलमधील आरोग्यसंस्था अन्व्हिसाने ही माहिती दिली. दरम्यान, असे असले तरी ब्राझीलमधील या लसीची चाचणी सुरूच राहणार असल्याचेही संस्थेने स्पष्ट केले होते.
