'ब्रिक्स'मध्ये मोदींचा पाकवर निशाणा; म्हणाले दहशतवादाला पाठिंबा देणाऱ्या देशांवर व्हावी कारवाई

ब्रिक्स परिषदेमध्ये मोदींनी पाकिस्तानचे नाव न घेता त्यावर निशाणा साधला. "दहशतवाद ही जगासमोरची सर्वात मोठी समस्या आहे. त्यामुळे दहशतवादाला पाठिंबा देणाऱ्या राष्ट्रांना दोषी ठरवून, त्यांच्यावर कारवाई करण्यासाठी इतर राष्ट्रांनी एकत्र यावे", असे मत पंतप्रधान नरेंद्र मोदींनी मंगळवारी व्यक्त केले.

नवी दिल्ली : "दहशतवाद ही जगासमोरची सर्वात मोठी समस्या आहे. त्यामुळे दहशतवादाला पाठिंबा देणाऱ्या राष्ट्रांना दोषी ठरवून, त्यांच्यावर कारवाई करण्यासाठी इतर राष्ट्रांनी एकत्र यावे", असे मत पंतप्रधान नरेंद्र मोदींनी मंगळवारी व्यक्त केले. ते १२व्या ब्रिक्स (ब्राझील-रशिया-भारत-चीन-दक्षिण आफ्रिका) परिषदेमध्ये बोलत होते. दहशतवादाच्या मुद्द्यावरुन त्यांनी पाकिस्तानवर नाव न घेता निशाणा साधला. 'जागतिक स्थिरता आणि सामायिक सुरक्षा ' हा या ब्रिक्स परिषदेचा विषय होता.

ब्रिक्स दहशतवाद विरोधी धोरण...

या ब्रिक्स परिषदेचे यजमानपद रशियाकडे होते. रशियाच्या अध्यक्षतेखाली ब्रिक्स दहशतवाद विरोधी धोरणाला अंतिम स्वरुप देण्यात आले आहे, याचा आम्हाला आनंद आहे असे मोदी म्हणाले. दहशतवादाविरोधात हे एक मोठे यश असून, आपल्या अध्यक्षपदाच्या काळात भारत हे कार्य आणखी पुढे नेईल, अशी ग्वाही मोदींनी यावेळी बोलताना दिली.

'शेरपा' तयार करणार अहवाल...

यावेळी बोलताना मोदी म्हणाले, की २०२१ मध्ये ब्रिक्सला १५ वर्षे पूर्ण होत आहेत. या निमित्ताने आमचे 'शेरपा' हे ब्रिक्सच्या १५ वर्षांतील विविध निर्णय आणि त्यांच्या परिणामांबाबत एक अहवाल तयार करु शकतात, असे मत पंतप्रधानांनी व्यक्त केले.

कोरोनानंतर ब्रिक्सचे महत्त्व..

कोविडोत्तर काळात जगाच्या उभारणीत ब्रिक्स देशांचे योगदान मोठे असणार आहे. आपल्या देशांमध्ये जगातील ४२ टक्क्यांहून अधिक लोकसंख्या आहे. आपले देश हे जगातील प्रमुख अर्थव्यवस्थांपैकी आहेत. त्यामुळे सध्याच्या जागतिक मंदीला तोंड देण्यासाठी ब्रिक्स देशांनी परस्पर व्यापार वाढवण्याच्या दृष्टीने विचार करायला हवा. आपल्या परस्पर संस्था आणि व्यवस्था, ब्रिक्स आंतरबँक सहकार्य व्यवस्था, न्यू डेव्हलमेंट बँक, आपत्कालीन राखीव व्यवस्था आणि सीमाशुल्क सहकार्य अशा काही संस्थांच्या माध्यमातून आपण जगाच्या अर्थव्यवस्थेला उभारी देऊ शकतो, असा विश्वास मोदींनी यावेळी व्यक्त केला.

आत्मनिर्भर भारत..

कोरोना नंतरच्या काळात एक सक्षम आणि अधिक बळकट अर्थव्यवस्था म्हणून भारत उभारी घेऊ शकतो. यासाठी देशात आत्मनिर्भर भारत अभियान सुरू करण्यात आले आहे. भारताची क्षमता आपण कोरोना काळात पाहिलीच. सुमारे १५० हून अधिक देशांना वैद्यकीय साहित्य आणि इतर मदत पाठवण्यास भारत यशस्वी ठरला. असे मोदींनी ब्रिक्सला संबोधित करताना म्हटले आहे.

हेही वाचा : मोदींनी बायडेन यांच्या बरोबर साधला संवाद; कोरोना आणि परस्पर सहकार्याबाबत केली चर्चा