बिजिंग - चीन सरकारने अमेरिका स्थित ब्लुमबर्ग वृत्तवाहीनीसाठी काम करणाऱ्या एका पत्रकाराला ताब्यात घेतले आहे. हा पत्रकार चिनी नागरिक असून त्याच्यावर राष्ट्रीय सुरक्षेला धोका असल्याचा आरोप लावण्यात आला आहे. अमेरिकेतील फायनान्शिअल एक्सप्रेसने यासंबंधीचे वृत्त दिले आहे.
साध्या वेशात आलेल्या पोलीस अधिकाऱ्यांनी हेझ फॅन या पत्रकाराला सोमवारी दुपारी त्याच्या घरातून ताब्यात घेतले. वृत्तपत्राच्या संपादकाशी संपर्क झाल्यानंतर काही वेळातच फॅन यांना ताब्यात घेण्यात आले. राष्ट्रीय सुरक्षा धोक्यात घातल्याचा ठपका त्यांच्यावर ठेवण्यात आला असून या प्रकरणाचा गुन्हा कठोर प्रकारात मोडतो. या गुन्ह्यात न्यायालयीन सहाय्यही मिळण्याची शक्यता कमी असते.
चीनमधील नागरिक परदेशी माध्यमांसाठी पूर्णवेळ काम करू शकत नाही -
चीन सरकार कोणत्याही परदेशी माध्यमासाठी पूर्णवेळ पत्रकार म्हणून काम करण्यास नागरिकांना परवानगी देत नाही. फक्त भाषांतर, संशोधक किंवा सहाय्यक या कामांसाठी परदेशी माध्यमे प्रतिनिधी नेमू शकतात. मात्र, त्यांना पत्रकार म्हणून काम करता येत नाही. नोंदणीकृत पत्रकाराला चीनमध्ये काम करता येत नाही. चीनमध्ये खासगी माध्यमे नसून सर्व माध्यमे सरकार नियंत्रित आहेत. अनेक पत्रकारांना चीनने याआधी तुरुंगात डांबले आहे.
