मुंबई - ज्येष्ठ अभिनेता दिलीप प्रभावळकर यांनी ‘वासूची सासू’, ‘संध्याछाया’, ‘नातीगोती’, ‘जावई माझा भला’, ‘कलम ३०२’, ‘घर तिघांचे हवे’ अशी अनेक नाटके केली आणि प्रेक्षकांचे मन जिंकले. चि. वि. जोशी यांच्या चिमणराव या पात्राला त्यांनी अमरत्व दिले. तसेच ‘श्रीयुत गंगाधर टिपरे’ यातील टिपरेआबा आजही लोकांना आठवतात. अष्टपैलू कलाकार दिलीप प्रभावळकर यांनी आपल्या चतुरस्त्र कामगिरीमुळे प्रेक्षकांच्या मनात घर केलेले आहे. अत्यंत मृदुभाषी असलेल्या प्रभावळकरांची लेखनातही गती आहे. झपाटलेला, एक डाव भुताचा, चौकट राजा, लगे रहो मुन्नाभाई सारख्या अनेक चित्रपटांतून त्यांनी चौफेर अभिनय-फटकेबाजी केली आहे तसेच त्यांनी अनुदिनी, अवतीभवती, आवाज दिलीप प्रभावळकरांचा, एका खेळियाने, कागदी बाण, गुगली, चूकभूल द्यावी घ्यावी, झूम, बोक्या सातबंडे भाग १ ते ३, हसगत सारखी पुस्तके लिहिली ज्यावर एकांकिका, नाटकं बनली गेली.
सध्या शाळांना सुट्ट्या आहेत. यावेळी मराठी रंगभूमीवर खास लहान मुलांसाठी मराठी नाटकं येत असतात. त्यातीलच एक म्हणजे दिलीप प्रभावळकर यांच्या नॅशनल अवॉर्ड विनिंग कादंबरीवर आधारित नाटक 'बोक्या सातबंडे'. हे नाटक बालप्रेक्षकांना प्रचंड आवडतं असून त्यांचे भरमसाठ मनोरंजन होत आहे. सुरुवातीला 'बोक्या सातबंडे' ही कादंबरी लिहिली गेली होती आणि त्यातील दिलीप प्रभावळकर यांनी लिहिलेल्या बोक्याच्या गमती जमती सर्वांनाच भावल्या होत्या. नंतर त्यावर चित्रपट बनला आणि त्यालादेखील प्रेक्षकांचा उदंड प्रतिसाद मिळाला. आणि हाच 'बोक्या सातबंडे' आता रंगभूमीवर धमाल करताना दिसतोय.
'बोक्या सातबंडे' या बालनाट्यात दिलीप प्रभावळकर एक अनोखी भूमिका वठवित आहेत. ते रंगमंचावर प्रत्यक्षात येत नसले तरी त्यांचे अस्तित्व त्यांच्या आवाजाच्या माध्यमातून रंगमंच जिवंत करते. त्यांची म्हणजे त्यांच्या आवाजाची या नाटकात महत्वाची भूमिका आहे आणि ते प्रत्येकाला आवडून जाते. दिलीप प्रभावळकरांचे वैशिष्ठ्यच आहे की नेहमी प्रत्येक गोष्ट समरसून करायची. आणि जेव्हा त्यांच्या संवादांना भरभरून दाद मिळते तेव्हा ते प्रामुख्याने अधोरेखित होते.
दिनू पेडणेकर, रणजित कामत, राहुल कर्णिक, आणि दीप्ती प्रणव जोशी हे बोक्या सातबंडे या नाटकाचे निर्माते आहेत. डॉ. निलेश माने या नाटकाला शब्दरूप दिले असून दिग्दर्शन केलंय विक्रम पाटील आणि दीप्ती प्रणव जोशी यांनी. गीतरचना वैभव जोशी यांची असून त्याला संगीतबद्ध केलं आहे निनाद म्हैसाळकर यांनी. मुख्य भूमिकेत आरुष प्रसाद बेडेकर असून या नाटकात यश शिंदे, सायली रामदास रामेश्वरी, ओंकार यादव, अंकुश काणे, स्वाती काळे, अमृता कुलकर्णी, सौरभ भिसे, प्रथमेश अंभोरे, आकाश मांजरे, स्नेहा धडवई, सागर पवार, शीवांश दीप्ती प्रणव जोशी यांच्याही महत्त्वपूर्ण भूमिका आहेत. सर्व वयोगटांतील प्रेक्षकांचे निखालस मनोरंजन करणारे व्यावसायिक नाटक 'बोक्या सातबंडे' हे अनामिका, भूमिका आणि मिलाप थिएटरची निर्मिती आहे.
हेही वाचा - Srk Reveals Buying Mannat : मन्नत खरेदीनंतर शाहरुख झाला होता कंगाल, म्हणून गौरी बनली 'इंटिरीयर डिझायनर'
