मुंबई - Gangster Lawrence Bishnoi : गॅंगस्टर लॉरेन्स बिश्नोईनं शनिवारी पहाटे कॅनडामधील पंजाबी गायक गिप्पी ग्रेवालच्या निवासस्थानी झालेल्या गोळीबाराच्या घटनेची जबाबदारी स्वीकारली आहे. ग्रेवालला याद्वारे बिश्नोईनं वॉर्निंग दिली आहे. ही कथित घटना कॅनडातील व्हँकुव्हरमधील व्हाईट रॉक परिसरात घडली. बिश्नोईनं म्हटलं की, हा गिप्पीला इशारा दिला आहे. त्यानं बॉलीवूड स्टार सलमान खानचं कौतुक करणं थांबवावं. त्यानं शेअर केलेल्या पोस्टमध्ये भाईजानला धमकीही दिली आहे. कॅनडातील बातम्यांनी ग्रेवालचा उल्लेख न करता म्हटलं आहे की, गोळीबाराची घटना स्थानिक कायदा अंमलबजावणी एजन्सीद्वारे पाहिली जात आहे. यावेळी कुणालाही दुखापत झाली नाही.
लॉरेन्स बिश्नोई शेअर केली पोस्ट : एका फेसबुक पोस्टमध्ये, बिश्नोईनं म्हटलं होतं की, 'तू सलमान खानचा भाई आहेस ना? त्याला सांग आता तुला वाचव. सलमान खानला हा एक संदेश नक्की दे. तुला आमच्यापासून कोणी वाचवू शकणार नाही. तू सिद्धू मूसवालाच्या मृत्यूवर खूप जास्त ओव्हरअ‍ॅक्ट केलं होतं. तो किती अहंकारी माणूस होता. तो कोणत्या गुन्हेगारी लोकांच्या संपर्कात होता हे तुला माहीत आहे. जोपर्यंत विकी मिड्डूखेडा जिवंत होता, तोपर्यंत तू त्याच्या मागे-पुढे फिरायचा. तू आता रडारवर आला आहे'. त्यानं असं पोस्टमध्ये लिहून गिप्पीला धमकी दिली होती. या घटनेनं पंजाबी संगीत उद्योगात धक्का बसला आहे.
