गोवा विधानसभा सभापती निवडणूक; भाजपतर्फे राजेश पाटणेकर यांचा उमेदवारी अर्ज दाखल

गोवा विधानसभेच्या सभापतीपदासाठी मंगळवारी निवडणूक होणार आहे.भाजप आमदार राजेश पाटणेकर यांनी उमेदवारी अर्ज दाखल केला आहे. यावेळी'आमच्याकडे पूर्ण बहूमत असून आम्ही सभापतीपदाची निवडणूक निश्चित जिंकणार आहोत. सरकारमधील आघाडीचे घटकपक्ष, अपक्ष आमच्यासोबत आहेत', असे मुख्यमंत्री सावंत म्हणाले.

पणजी - गोवा विधानसभेच्या सभापतीपदासाठी मंगळवारी निवडणूक होणार आहे. त्यासाठी आज (सोमवार) सत्ताधारी भाजपतर्फे आमदार राजेश पाटणेकर यांनी तर काँग्रेसकडून आमदार प्रतापसिंह राणे यांनी उमेदवारी अर्ज दाखल केला आहे.
लोकसभा निवडणुकांच्या रणधुमाळीनंतर गोवा विधानसभेच्या सभापतीपदासाठी मंगळवारी निवडणूक होणार आहे. तत्कालीन सभापती डॉ. प्रमोद सावंत यांची मुख्यमंत्री म्हणून निवड झाल्यानंतर मागील 18 एप्रिलपासून हे पद रिक्त होते. याचा प्रभार उपसभापती मायकल लोबो यांच्याकडे देण्यात आला होता.

भाजप आमदार राजेश पाटणेकर यांनी उमेदवारी अर्ज दाखल केला. यावेळी त्यांच्यासोबत मुख्यमंत्री डॉ. प्रमोद सावंत, उपमुख्यमंत्री विजय सरदेसाई, बाबू आजगावकर, गोवा प्रदेश भाजपाध्यक्ष विनय तेंडुलकर आणि विविध खात्याचे मंत्री उपस्थित होते.'आमच्याकडे पूर्ण बहूमत असून आम्ही सभापतीपदाची निवडणूक निश्चित जिंकणार आहोत. सरकारमधील आघाडीचे घटकपक्ष, अपक्ष आमच्यासोबत आहेत', असे मुख्यमंत्री सावंत म्हणाले. याचबरोबर पक्ष आणि घटकपक्ष, अपक्ष या सर्वांशी चर्चा करूनच पाटणेकर यांची सभापतीपदासाठी उमेदवार म्हणून निवड करण्यात आली असल्याची माहिती त्यांनी यावेळी दिली.