ठाणे - शिवसेनेचे बंडखोर नेते एकनाथ शिंदे ( Rebel Eknath Shinde ) यांनी महाविकास आघाडी सरकारसह ( Mahavikas Aghadi government ) पक्षप्रमुखांना ठेंगा दाखवत ४२ आमदारांसह गुवाहाटी गाठली. मुंबईत हाताच्या बोटावर मोजता येतील इतक्याच शिवसैनिकांनी विरोध दर्शविला. मात्र, शिंदे यांच्या भूमिकेला ठाण्यातील बहुतांश शिवसैनिकांकडून पाठिंबा ( Shiv Sainiks support Ekwath Shinde ) मिळत असल्याचे दिसून येत आहे. ठाण्याचे जिल्हाप्रमुख नरेश म्हस्के यांनीही आपला पाठींबा शिंदे यांना दर्शवला आहे. राज्यातील पहिल्याच जिल्हाप्रमुखाने पाठिंबा दर्शवला असून शाखाप्रमुख तसेच विभागप्रमुखांनीही शिंदे यांच्या सोबत असण्याला सहमती दर्शवली आहे.
कार्यकर्ते एकनाथ शिंदे यांच्या पाठिशी - ठाण्यातील शिवसेनेचे नेते एकनाथ शिंदे यांनी विधान परिषदेच्या निवडणुकीनंतर आघाडी सरकारमधून फारकत घेतल्यामुळे राजकीय वातावरण ढवळून निघाले आहे. मुंबईमध्ये काही ठिकाणी एकनाथ शिंदे यांच्या नावाने खडे फोडले जात आहे. मात्र, ठाण्यात वातावरण शांत आहे. ठाण्यातील शिवसेनेचे बहुतांश पदाधिकारी, नगरसेवक, कार्यकर्ते एकनाथ शिंदे यांच्या पाठिशी असल्याचे दिसत आहे. त्याचे प्रतिबिंब शहरभर लागलेल्या बॅनरबाजीतून दिसून येत आहे. अनेकांनी सोशल मिडियातून शिंदे यांच्या वाटचालीला सहमती दर्शवल्याचे दिसून येत आहे.
फेसबुकच्या माध्यमातून अनेकांनी पाठिंबा दर्शवत पोस्ट टाकल्या आहेत. ठाण्यामध्ये आत्तापर्यंत कुठेही एकनाथ शिंदे यांनी घेतलेल्या भूमिकेविरोधात जाहीर मतप्रदर्शन झाल्याचे दिसलेले नाही. दरम्यान, गेले दोन दिवस कुठलीही प्रतिक्रिया न देणारे माजी महापौर नरेश म्हस्के यांनी गुरुवारी ट्वीटरवर एकनाथ शिंदे यांची छबी झळकवत 'साहेब... आम्ही तुमच्या सोबत ... आमची साथ धगधगत्या हिंदुत्वाच्या ज्वाळांना 'असे ट्विट टाकले आहे.
हेही वाचा - Maharashtra Political Crisis: हम हार नही मांनेगे ... आता आमची वेळ, सरकार कार्यकाळ पुर्ण करणार - राऊत
