खारघर मध्ये तरुणावर गोळीबार करणारे चौघे गजाआड

पेण येथुन वाशी येथे फिरण्यासाठी आलेल्या तरुणाला लुटण्यासाठी त्याच्यावर गोळीबार केल्याची धक्कादायक घटना शनिवारी रात्री घडली होती.

नवी मुंबई - पेण येथुन वाशी येथे फिरण्यासाठी आलेल्या तरुणाला लुटण्यासाठी त्याच्यावर गोळीबार केल्याची धक्कादायक घटना शनिवारी रात्री घडली होती. प्रतीक रवींद्र आहेर (24) या तरुणावर शनिवारी रात्री खारघर येथे गोळीबार करण्यात आला होता. दरम्यान, गोळीबार करून फरार झालेल्या चौघांना पकडण्यात पोलिसांना यश आले आहे.
विपीन शैलेंद्र ठाकुर (19), गोपाल ननु सिंह (23), अभिनंदनकुमार गणेश शर्मा (23) आणि मुचन नागेंद्र ठाकुर (19) अशी या आरोपींची नावे आहेत. लुटमार करुन मिळालेल्या पैशातून हॉटेल सुरु करण्याची या तरुणांची योजना असल्याचे तपासात आढळून आले आहे. पोलिसांनी या आरोपींकडून रिव्हॉल्वर व जिवंत काडतुस जप्त केली आहे.

खारघर मध्ये झाला लुटण्याचा प्रकार-प्रतीक वाशी येथून सायन पनवेल रस्त्यावरून मोटार सायकलने घरी जात होता. यावेळी खारघर येथील रायन इंटरनॅशनल शाळेसमोरील रस्त्यावर सिगरेट ओढण्यासाठी प्रतीक गेला होता. याचवेळी त्या ठिकाणी आलेल्या आरोपींनी त्याच्याकडून मोबाईल, पैसे व त्याच्या मोटरसायकलच्या चावीची मागणी केली. त्याने ते देण्यास नकार दिल्याने एकाने तरुणाजवळचा मोबाईल फोन जबरदस्तीने खेचण्याचा प्रयत्न केला. त्याने विरोध केल्यानंतर त्यातील एका आरोपीने पीडित तरुण, प्रतीक आहेर याच्या डाव्या पायाच्या मांडीवर आपल्याकडील पिस्तुलने एक गोळी झाडली होती. गोळीबारात तरुण जखमी झाल्यानंतर तिन्ही आरोपींनी त्या ठिकाणावरुन पलायन केले. सीसीटीव्ही फुटेजद्वारे आरोपींचा लागला शोध-अज्ञात आरोपींवर खारघर पोलीस ठाण्यात गुन्हा दाखल करुन त्यांचा शोध सुरु केला. पोलिसांनी खारघर परिसरातील सर्व सीसीटीव्ही फुटेजची तपासणी केली. अखेर पोलिसांना कोपरा गावातील कॅमेरा तपासला. त्यात गोळीबार झाल्याच्या वेळेत 4 तरुण आढळून आले. या तरुणांबाबत पोलिसांनी माहिती मिळवली. तर दोन दिवसांपुर्वी कोपरा गावातील चाळीत 4 तरुण राहाण्यासाठी आल्याची माहिती पोलिसांना प्राप्त झाली. सापळा रचून घेतले ताब्यात-

पोलिसांनी कोपरा भागात सापळा दोन तरुणांना ताब्यात घेतले. दोन्ही आरोपींकडे चौकशी केली. त्यांनी तरूणाला लुटण्यासाठी त्याच्यावर गोळीबार केल्याची कबुली दिली. पोलिसांनी दोघांना अटक केली नंतर त्यांच्या इतर दोन साथिदारांना देखील अटक केले. ज्या पिस्तूल मधून आरोपींनी गोळीबार केला ते पिस्तूल व जिवंत काडतूस देखील जप्त केले. लुटमार करुन मिळालेल्या पैशातून हॉटेल सुरु करण्याचा प्लान आखल्याचे त्यांच्या चौकशीतून निष्पन्न झाले आहे.

हेही वाचा- आज महाराष्ट्रात सर्वात कमी रुग्णांची नोंद, 30 रुग्णांचा मृत्यू