सोलापूर - महाराष्ट्राची कुलस्वामिनी तुळजाभवानीची मोठी बहीण म्हणून ओळख असलेल्या यमाई देवीच्या यात्रेला सुरुवात झाली आहे. उत्तर सोलापूर तालुक्यातील मार्डी या गावी यमाई देवीचे मंदिर आहे. दरवर्षीप्रमाणे यावर्षीही चैत्र महिन्यात यात्रेला सुरुवात झाली आहे. यात्रेला शनिवारपासून सुरुवात झाली असून एकूण चार छबिना यावेळी निघतात.
मार्डी येथे यमाई देवीचे पुरातन मंदिर आहे. रंगनाथ स्वामी गोसावी यांनी ८०० वर्षांपूर्वी मंदिरात यमाई देवीची प्राणप्रतिष्ठा केली होती. मार्डी येथील यमाई देवी तुळजापूरच्या तुळजाभवानी आईची मोठी बहीण म्हणून ओळखली जाते. साक्षात आदिशक्तीच्या वास्तव्यामुळे मार्डीला शक्तीपीठांचा वारसा लाभला आहे. तुळजाभवानीच्या दर्शनानंतर यमाई देवीचे दर्शन घेण्याची परंपरा भाविक पाळतात. गुलबर्गा जिल्ह्यातील शेडम चीतापूर जवळील रंगनाथ स्वामी गोसावी हे देवीचे निस्सिम भक्त होवून गेले.
श्री देवी सप्तशती या ग्रंथाचे रचनाकार पद्मशाली समाजाचे कुलदैवत तथा महान शिवभक्त श्री मार्कंडेय ऋषी यांची तपोभूमी म्हणून मार्कंडेय पुराणात मारोडी या गावाचा उल्लेख आढळतो. तेच मारोडी म्हणजे सध्याचे मार्डी गाव आहे. भागवत ग्रंथांमध्येही मार्डीचा उल्लेख आढळतो. सोलापूर जिल्ह्यासह मराठवाड्यातील हजारो भाविक आई यमाई देवीच्या दर्शनासाठी मार्डी येथे येतात.
