सोलापुरात कोरोनाचा वाढता प्रादुर्भाव कमी करण्यासाठी दिल्ली पॅटर्न राबवा: आपची मागणी

आप सरकारने दिल्लीमध्ये नागरिकांना मास्क, साबण, सॅनिटायझरचे मोफत वाटप केले. मोफत लसीकरण केले. हा कोविड -19 चा मूळ उपचार आहे. दिल्लीतील लोकसंख्या आणि लोकसंख्या घनता सोलापूरपेक्षा अधिक आहे. हा दिल्ली पॅटर्न सोलापुरातील स्थानिक प्रशासनाने राबवावा, अशी मागणी करत लॉकडाऊनला तीव्र विरोध केला आणि तसे निवेदन जिल्हाधिकाऱ्यांना दिले.

सोलापूर - दिल्ली येथील आम आदमी पार्टीच्या राज्य सरकारने लॉकडाऊन न लावता वेगवेगळ्या उपाययोजना राबवत कोविड 19 च्या वाढत्या रुग्णसंख्येवर नियंत्रण मिळवले आहे. सोलापूरच्या स्थानिक प्रशासनाने देखील कोरोनाचा वाढता प्रादुर्भाव कमी करण्यासाठी दिल्ली पॅटर्न राबवावा, अशी मागणी आम आदमी पार्टीने जिल्ह्याधिकाऱ्यांकडे केली आहे. तसेच लॉकडाऊन लावणे हा मूर्खपणा असल्याचे मत आपच्या नेत्यांनी व्यक्त केले आहे.

काय आहे दिल्ली पॅटर्न-
लॉकडाऊन लावणे हा कोविड 19 चा मुळीच इलाज नाही. कोरोना विषाणूची साखळी तोडण्यासाठी मार्च 2020 पासून जवळपास तबल दोन ते अडीच महिने लॉकडाऊन लागू केले होते. तरी देखील रुग्णसंख्या वाढत गेली. शेवटी दिल्ली येथील राज्य सरकारने लॉकडाऊन न लावता वेगवेगळ्या उपाययोजना आखल्या. आप सरकारने दिल्लीमध्ये नागरिकांना मास्क, साबण, सॅनिटायझरचे मोफत वाटप केले. मोफत लसीकरण केले. हा कोविड -19 चा मूळ उपचार आहे. दिल्लीतील लोकसंख्या आणि लोकसंख्या घनता सोलापूरपेक्षा अधिक आहे. हा दिल्ली पॅटर्न सोलापुरातील स्थानिक प्रशासनाने राबवावा, अशी मागणी करत लॉकडाऊनला तीव्र विरोध केला आणि तसे निवेदन जिल्हाधिकाऱ्यांना दिले.

लॉकडाऊन लावल्यास हातावर पोट असणाऱ्यांची उपासमार होणार-सोलापुरात हातावर पोट असणाऱ्यांची आणि श्रमिक वर्गाची संख्या अधिक आहे. यामध्ये कामगार वर्ग, रिक्षा चालक यांची 'रोज कर, मगच खा' अशी अवस्था आहे. पण सोलापूरच्या स्थानिक प्रशासनाने कोरोनाच्या वाढत्या रुग्णसंख्येवर उपाय म्हणून लॉकडाऊन लावून कष्टकऱ्यांवर उपासमारीची वेळ आणण्याचे पाप करू नये, अशी मागणी यावेळी केली. हे निवेदन देताना अ‌ॅड सागर पाटील, अ‌ॅड खतीब वकील, प्राजक्त चांदणे, अस्लम शेख, निहाल शेख, इम्रान सगरी आदी उपस्थित होते.

हेही वाचा - राज्यात शुक्रवारी 25 हजार 681 नव्या कोरोना रुग्णांची नोंद