पुणे- ओझरमध्ये 15 तलवारी बाळगणाऱ्या एकाला पुणे ग्रामीण दहशतवाद विरोधी पथकाच्या पोलिसांनी अटक केली आहे. सोमनाथ राजाराम साळुंके (वय 26 वर्षे रा. धनगरवाडी ता.जुन्नर) असे आरोपीचे नाव आहे.
सोमनाथ हा व्यवसायाने लोहार असून लोखंडी वस्तू, हत्यारे बनविण्याचे काम करतो. मात्र त्याने पाच मुठ लावलेल्या तर दहा मोकळ्या धारदार तलवारी तयार केल्या होत्या. या सर्व तलवारी घेऊन सोमनाथ ओतूरच्या दिशेने दुचाकीवर निघाला होता. यावेळी पुणे ग्रामीण दहशतवाद विरोधी पथकाच्या पोलिसांनी चौकशी करत तलवारीसह आरोपीला अटक केली आहे. यावेळी त्याच्याकडील 15 तलवारी जप्त करण्यात आल्या आहेत.
ओतुर, आळेफाटा या भागात मुंबई व नगर या ठिकाणचे अनेक गुन्हेगार परिसरात वास्तव्यास असतात. त्यामुळे या तलवारी नक्की कुणासाठी बनविण्यात आल्या होत्या याचा पोलीस शोध घेत आहेत.
