पुणे - राष्ट्रीय तपास यंत्रणा अर्थात एनआयएने पुण्यातील कोंढवा भागातील तल्हा खान नावाच्या 38 वर्षीय व्यक्तीच्या घरावर छापा टाकल्याची घटना समोर आली आहे. (NIA raids in Pune) दरम्यान, इस्लामिक स्टेटशी संबंधित कागदपत्रे आणि डिजिटल साहित्य जप्त केले आहे. सोमवारी सकाळी 10 वाजता तल्हा खानच्या घरी दिल्लीहून एनआयएचे अधिकारी हे आले होते. तब्बल 8 तास तल्हा खानची चौकशी करण्यात आली. या चौकशीत एनआयएच्या अधिकाऱ्यांनी खान याच्याकडून लॅपटॉप आणि मोबाईल जप्त केले आहे.
या प्रकरणाचा अधिक तपास सुरु आहे
तल्हा खान इस्लामिक स्टेट खुरासान प्रांत या दहशतवादी संघटनेच्या संपर्कात होता आणि या संघटनेची विचारधारा पसरवण्याचे काम करत होता असा संशय एनआयएला आहे. (NIA raids in Kondhwa area of pune) तल्हा खान याच्या घरावर छापा टाकल्यानंतर तसेच घराची झाडाझडती घेतल्यानंतर डिजिटल साहित्य जप्त करण्यात आले आहे. सादिया अन्वर शेख आणि नबील सिद्दीकी खत्री यांना (जुलै 2020)मध्ये एनआयएने अटक केली होती. (NIA Raids in Kondhwa) तल्हा खान हा नबील सिद्दीकी खत्रीच्या संपर्कात असल्याचं एनआयएला तपासात आढळून आल्यानंतर ही छापेमारी करण्यात आली. या प्रकरणाचा अधिक तपास सुरु आहे.
चौघांना अटक करण्यात आली
या प्रकरणात जहानझीब वानी आणि त्याची बायको हिना बशीर बेग या काश्मिरी दाम्पत्याला मार्च (2020)मध्ये अटक करण्यात आल्यानंतर दिल्लीत लोधी कॉलनी पोलीस ठाण्यात (8 मार्च 2020)रोजी गुन्ह्याची नोंद करण्यात आली होती. त्यानंतर एनआयएने (20 मार्च 2020)रोजी या प्रकरणाची पुन्हा नोंद केली होती. या प्रकरणाच्या तपासादरम्यान अब्दुल्ला बसीत, सादिया अन्वर शेख, नबील सिद्दीकी खत्री आणि अब्दुल रहमान या चौघांना अटक करण्यात आली होती.
भारतात दहशतवादी कारवाया करण्यासाठी समविचारी लोकांचा पाठिंबा
या प्रकरणी आतापर्यंत सहा आरोपींवर आरोपपत्र दाखल करण्यात आलं आहे. त्यांच्यावर भारतात दहशतवादी कारवाया करण्यासाठी समविचारी लोकांचा पाठिंबा मिळवून (ISIS)ची विचारसरणी पसरवण्याचा कट रचणे, (ISIS)साठी काम करण्यासाठी सेल स्थापन करणे, निधी उभारणे, शस्त्रे गोळा करणे, आयईडी बनवणे आणि टार्गेट करुन हत्या करणे, यांसारखे आरोप निश्चित करण्यात आले आहेत.
हेही वाचा - १९८४ नंतर प्रथमच, आजपासून मुंबई महापालिकेचा कारभार प्रशासकाच्या हाती
