पुणे - राज्य सरकार मराठा आरक्षणासाठी न्यायालयात गेले आहे. आणखी कुणी जात असेल तर, दहा जणांनी न्यायालयात जावे, अशी उपरोधिक प्रतिक्रिया राष्ट्रवादीचे अध्यक्ष शरद पवारांनी आज दिली. पार्थ पवार यांनी मराठा आरक्षणाबाबत सर्वोच्च न्यायालयात जाणार असल्याचे ट्विट केले होते. त्यांच्या भूमिकेवर शरद पवारांनी ही प्रतिक्रिया दिली आहे.
पार्थ पवार यांनी मराठा आरक्षणावरून सर्वोच्च न्यायालयात जाण्याचा इशारा दिल्यानंतर प्रथमच राष्ट्रवादीचे अध्यक्ष पवार यांनी प्रतिक्रिया दिली. त्यानंतर त्यांनी मराठ आरक्षणावरील स्थगिती उठावी, हीच सरकारची आणि राष्ट्रवादीची भूमिका असल्याचे स्पष्ट केले.
अजित पवार यांनी पार्थ पवार यांच्या ट्विटवर ही दिली प्रतिक्रिया
पार्थ पवार यांनी केलेल्या ट्विटसंदर्भात अजित पवार यांनी देखील आज मौन सोडले आहे. पुणे स्टेशनवर पत्रकारांशी बोलताना अजित पवार म्हणाले की, मुलगा काय ट्विट करतो, हे मी पाहत नसतो, मला तेवढेच उद्योग नाहीत. राज्याच्या विविध जबाबदाऱ्या मला बघायच्या असतात, असे सांगून त्यांनी या प्रश्नाला पूर्णविराम देण्याचा प्रयत्न केला.
अजित पवार म्हणाले, की पार्थला ट्विट करण्याचा स्वतंत्र अधिकार आहे. प्रत्येकाने काय ट्विट करावे, हा त्याचा अधिकार असल्याचे उपमुख्यमंत्र्यांनी स्पष्ट केले. राष्ट्रवादीच्या खासदार सुप्रिया सुळे यांनी मराठा आरक्षणाविषयी आधीच भूमिका जाहीर केल्याची आठवण त्यांनी करून दिली.
संबंधित बातमी वाचा-मराठा आरक्षणा बाबत पार्थ पवारांच्या ट्वीटने पुन्हा एकदा खळबळ, म्हणाले...
काय म्हणाले होते पार्थ पवार ट्विटमध्ये?
मराठा आरक्षणासंदर्भात पार्थ पवार यांनी ट्विट केल्याने चर्चेला उधाण आले आहे. त्यांनी गुरुवारी ट्विटमध्ये म्हटले होते की, विवेकची आत्महत्या सर्वांचा विचार करायला लावणारी आहे. एका पिढीचे भवितव्य पणाला लागले आहे. हे सगळे पाहता सर्वोच्च न्यायालयात जाण्याखेरीज माझ्यासमोर पर्याय नाही.
संबंधित बातमी वाचा-'मुलगा काय ट्विट करतो हे मी पाहत नसतो...मला तेवढेच उद्योग नाहीत!
मराठा सामाजाच्या आरक्षणासाठी विवेकने आत्महत्या केल्याचे ऐकून हादरून गेलो. अशा दुर्दैवी घटनांचे सत्र सुरू होण्याआधीच मराठा नेत्यांनी जागे होण्याची गरज असून आरक्षणासाठी लढायला हवे. महाराष्ट्र सरकारनेही यात तत्काळ लक्ष घालावे, असेही पार्थ यांनी ट्विटमध्ये म्हटले आहे.
काही दिवसांपूर्वी पार्थ यांनी राममंदिराबाबत ट्विट करत शरद पवारांची नाराजी ओढवून घेतली होती.
