पुणे - संशयावरुन झडती घेतलेल्या जोडप्याच्या बॅगमधून एक कोटी साठ लाख रुपये किंमतीचे तब्बल दीड किलो ब्राऊन शुगर जप्त करण्यात आली आहे. आज दुपारी एक वाजण्याच्या सुमारास बावधन परिसरातील चांदणी चौकात संबंधित कारवाई करण्यात आली. सेलवम नरेशन देवेंदर(57) व वासंती चिनू देवेंदर(57) अशी अटक करण्यात आलेल्या दोघांची नावे असून, दोनही आरोपी सायन कोळीवाडा येथील रहिवासी आहेत.
पोलिसांनी दिलेल्या माहितीनुसार, काही पोलीस अधिकारी आणि कर्मचारी कोथरूड पोलीस ठाण्याच्या हद्दीत गस्त घालत असताना त्यांना हे दाम्पत्य चांदणी चौकाजवळ संशयास्पद अवस्थेत उभे असलेले आढळले.
पोलिसांनी त्यांना हटकल्यानंतर त्यांनी निघून जाण्याचा प्रयत्न केला. परंतु, पोलिसांनी त्यांना ताब्यात घेऊन झडती घेतली. यानंतर त्यांच्याजवळील बॅगमध्ये 1 किलो 540 ग्रॅम ब्राऊन शुगर सापडली. याची आंतरराष्ट्रीय बाजारपेठेतील किंमत जवळपास 1 कोटी 60 लाख रुपये आहे.
त्यांनी हे अंमली पदार्थ कुठून आणले तसेच ते कोणाला देणार होते, याबाबत तपास सुरू असल्याचे पोलिसांनी सांगितले.
